Investigadores vigueses deseñan como identificar as embarazadas con risco de hipertensión na xestación

Actualizado: sábado, 26 abril 2008 12:01

SANTIAGO DE COMPOSTELA, 26 Abr. (EUROPA PRESS) -

Investigadores do Laboratorio de Bioingenería e Cronobiología de la Universidad de Vigo deseñaron unha proba que permite a identificación das embarazadas que terán complicacións hipertensivas durante o período de xestación.

Un equipo de nove persoas, dirixido por Ramón Hermida, traballa na actualidade en dúas liñas fundamentais: por un lado, a monitorización ambulatoria da presión arterial e tratamentos de hipertensión e, por outra, risco vascular e hipertensión no embarazo, a través de dous proxectos, HYGIA e MADRE, moi entrelazados.

Coordinada polo laboratorio, HYGIA é unha rede na que se integran centros de atención primaria e hospitais de toda Galicia co fin de lograr mellorar a valoración diagnóstica do paciente hipertenso para, así, establecer o mellor esquema terapéutico e mellorar o seu grao de control, diminuíndo, polo tanto, o risco de problemas cardiovasculares.

Trátase dun servizo asistencial a todos os centros que se queiran integrar no Servizo Galego de Saúde, xa que permite on line, dende uns servidores que están na Escola Técnica Superior de Enxeñeiros de Telecomunicación, obter un informe estandarizado dos pacientes hipertensos aos que se lles realiza unha monitorización ambulatoria.

DISPOSITIVO PORTÁTIL.

"Mídeselles a presión arterial cun dispositivo portátil durante dous días, o denominado holter de presión e, con esta información, obtense un informe a través dun programa específico que creamos no laboratorio, que permite valorar o estado dese paciente", sinalou Ramón Hermida.

A maior parte dos centros que participan neste momento son do eixe Vigo-Pontevedra-Santiago, se ben están integrados de toda Galicia e progresivamente irán incorporándose máis. Segundo Hermida, "a día de hoxe nos centros galegos aínda non está xeneralizada a realización de holters de presión, senón simplemente como de investigación". No entanto, salientou que "cada vez son máis os PAC que contan con esta ferramenta e, polo tanto, poderían participar nesta rede".

Pola súa banda, o proxecto MADRE (Monitorización Ambulatoria para o Diagnóstico e Valoración de Riscos no Embarazo) complementa o HYGIA cun esquema paralelo no que a Universidade de Vigo achega todo o desenvolvemento tecnolóxico para avaliar cun informe, tanto a situación da muller no embarazo como nas semanas posteriores ao parto.

CRONOTERAPIA.

Unha das liñas nas que o grupo leva traballando nos últimos 15 anos é a cronoterapia, é dicir, a administración de fármacos atendendo aos biorritmos que ditan o funcionamento do organismo humano.

Esta técnica permite, en función do patrón de hipertensión arterial que ten o paciente ao longo do día, administrar os fármacos á hora máis axeitada e lograr así un mellor grao de control e unha redución maior do risco cardiovascular que ten ese paciente. "Con só ter en conta a hora de administración pódese lograr reducir efectos secundarios ou mellorar o grao de control sen aumentar os custos", concluíu Hermida.