SANTIAGO DE COMPOSTELA, 26 Jul. (EUROPA PRESS) -
O voceiro do Grupo Parlamentario Socialista, Abel Losada, anunciou que a súa formación volverá pedir a comparecencia do presidente da Xunta, Alberto Núñez Feijóo, pola fusión das caixas galegas --Caixanvova e Caixa Galicia--, despois da comparecencia do que foi copresidente de Novacaixagalicia, Julio Fernández Gayoso, este xoves no Congreso.
De feito, despois de que Gayoso dixese que el non tivo o informe da auditoría encargada pola Xunta e que avalou a fusión, Abel Losada considera que demostra que "Feijóo forzou a fusión falida das caixas galegas". "As súas mentiras e trampas en relación á fusión das caixas están a quedar agora á vista de todos", manifesta.
A falta de coñecemento da auditoría, "alimenta a desconfianza dos socialistas" sobre o contido deste informe, o cal pediron "sen éxito" en varias ocasións a través das prerrogativas parlamentarias que lle permiten solicitar información, segundo indicou o grupo do PSdeG nun comunicado.
O voceiro na Cámara galega desta formación subliñou que "cada vez é máis necesaria" a creación dunha comisión de investigación para que se explique a "verdade" do que se"está a ocultar".
Así, Abel Losada afirmou que "cada vez son máis claros os indicios de que o grande logro de Feijóo nesta lexislatura foi cavar a tumba do sistema financeiro galego".
Andalucía
