UVIÉU, 7 May. (EUROPA PRESS) -
La conseyera d'Educación, Lydia Espina, presidió esti martes en Corvera l'actu d'entrega de diplomes a los ganadores de los cinco certames escolares promovidos pola 45 Selmana de les Lletres Asturianes, onde animó a los estudiantes a presentase a les pruebes de certificación d'asturianu y al premiu d'escelencia nuevu.
A la ceremonia, que se recupera depués de la so interrupción pola pandemia, asistieron tamién l'alcalde corveranu, Iván Fernández; el director xeneral d'Inclusión Educativa y Ordenación, David Artime, y la xefa de serviciu de la Planificación del Asturianu, de la Conseyería de Cultura, Política Llingüística y Turismu, Juncal Velasco.
Unos 600 estudiantes de cuasi un centenar de centros educativos participaron nos certames. En total, presentáronse 400 trabayos nes cinco modalidaes: creación artística/lliteraria, cartelismu, creación audiovisual, teatru escolar y, como novedá d'anguaño, de podcast.
L'actu d'entrega de diplomes tuvo presentáu por Xuan Santori, asesor técnicu docente de la Conseyería d'Educación, y cuntó cola presencia de 39 centros educativos y 365 participantes nel Teatru El Llar, de Les Vegues, cedíu pol conceyu a la conseyería.
Espina, que pronunció la so intervención n'asturianu, animó a los presentes a presentase a les pruebes de certificación de llingua asturiana, accesibles a partir de los 16 años. Esa prueba p'acreitar el nivel va celebrase a finales de setiembre y principios d'ochobre y el plazu d'inscripción acaba esti vienres, 10 de mayu.
La conseyera convidó tamién a los estudiantes a optar a los Premios d'Escelencia de conocencia del asturianu o gallego-asturianu, "que vamos poner en marcha yá na edición que vien y que tien una ceremonia dentrega de premios guapísima onde damos exemplu de la calidá del nuestru sistema educativu", afirmó. Espina concluyó con otra invitación al alumnáu: "A que sigáis esforzándovos nel apredimientu de les nuestres llingües y tamién nes demás materies que formen parte del vuestru cullículu"
Andalucía
