Pop Piquiñín, llibru-discu pa neños y neñes con lletres, ilustraciones y les canciones más populares de Petit Pop

   UVIÉU, 9 Dic. (EUROPA PRESS) -

   Yá ta nes llibreríes Pop Piquiñín, llibru-discu qu'axunta los meyores cantares de Petit Pop n'asturianu. 'Pop Piquiñín, una escoyeta de les canciones n'asturianu de Petit Pop' ye'l títulu d'esti cancioneru, editáu por La Fabriquina y ilustráu por Pedro Balmaseda. La obra inclúi un CD coles canciones más populares de la banda, y tamién los sos últimos singles, traducíos por primer vez al asturianu pa esta cuidada edición

   ¿Quién nun quedría que-y contaren la so vida como si fora una canción? Pues xusto eso ye lo que fai Pop Piquiñín, alter ego de la popular banda Petit Pop col que lleven editaos dende hai quince años tolos sos discos traducíos al asturianu. Narrar, como una crónica musical, con tenrura y abondu sentíu del humor, la infancia y esi tiempu dalgo alloriáu que se vive nes cases cuando llega un miembro nuevu a la familia.

   D'esa rellumante discografía sal agora esti llibru-discu, editáu por La Fabriquina y compuestu por una escoyeta de diez canciones onde les lletres acompañénse coles ilustraciones del dibuxante Pedro Balmaseda, diseñador de cabecera de la banda, y tamién por anécdotes y curiosidaes sobre cada canción contaes pol propiu grupu.

   Con esti nuevu lillibru-discu, de edición cuidada y tapa duro, la editorial La Fabriquina sigue enanchando la so nomada colección de música infantil n'asturianu, compuesta por títulos como Kikirikikí, canciones pa neñes y neños d'Alicia Álvarez o Canciones pa la Xentiquina. Una selección sentimental de Nacho Fonseca, disponibles nel so catálogu.