UVIÉU, 7 May. (EUROPA PRESS) -
El portavoz del Principáu y conseyeru de Facienda, Guillermo Peláez, llamentó el "portazu nuevu" del presidente del PP asturianu, Álvaro Queipo, a la oficialidá y preguntó a los 'populares' a quién dixebra esti marcu llegal en Galicia.
"¿Por qué equí alloña y resquiebra lo qu'ellí xune y cohesiona? Nunca vimos que los populares gallegos aseguren que la oficialidá ye una imposición que taraza les sos llibertaes, sinón tolo contrario. Otra cosa ye que la oficialidá resquiebre al PP asturianu. Si ye asina, que lo reconozan", indicó.
El presidente del Principáu, Adrián Barbón, convocó a tolos grupos parllamentarios -menos Vox- a una xunta'l día 23. L'oxetivu ye alcordar una proposición de llei que lleve a la reforma del Estatutu d'Autonomía y la reconocencia de la oficialidá de les llingües propies d'Asturies.
Sicasí, Queipo anunció esta mañana que'l PP va dir a la cita, pero va caltener el so vetu a la oficialidá. L'apoyu del Partíu Popular ye imprescindible pa la reforma del Estatutu, porque esixe un mínimu de 27 votos favorables.
"Nós vamos plantear una proposición de llei. Pa la so toma en consideración va ser abondo una mayoría simple qu'esperamos consiguir. Ehí yá va quedar claro que la representación mayoritaria de la sociedá defende'l camín hacia la oficialidá. Pero depués nun nos engañemos, cuando llegue'l momentu de votar la proposición de llei, sí va ser necesario'l respaldu del PP", esplicó'l portavoz.
"Con too, magar esti portazu, vamos dir hasta'l final. Primero, porque somos un gobiernu de diálogu y consensu y nun arrenunciamos a que'l PP rectifique", añadió Peláez. "Y, segundu, porque ye tiempu de demostrar l'asturianismu con fechos, non col piquín. La política seria nun va de quedar bien con tol mundu. Nun se trata de dicir a cada cual lo que quier oyer", dixo.
"Esto nun va de presumir d'asturianista pela mañana y d'antiasturianista pela tarde pa quedar bien con unos y con otros. Na política seria hai que dir cola verdá per delantre", indicaron fontes del Executivu.
En llinia con esti razonamientu, el conseyeru emplazó al PP a facer el so propiu cambiu, "como fixo la Federación Socialista Asturiana en 2017 col lideralgu coraxosu d'Adrián Barbón". "Namás faen falta trés coses: lideralgu, audacia y respetu a la cultura asturiana. Porque col asturianismu nun se xuega, merez un respetu", señaló Peláez.
El portavoz del gobiernu animó al PP a dialogar y negociar sobre la oficialidá y indicó que "pa ello va ser necesario que'l Partíu Popular abandone la so refuga histórica a la cultura asturiana, pero pue facese".
Sicasí, si'l PP s'empeña nel inmovilismu, "que nun busque escuses pa xustificar la so negativa. Les polémiques inútiles nun nos interesen. El Gobiernu del Principáu ta p'alcordar y pa responder a los retos d'Asturies, y ún d'ellos ye defender la nuestra cultura con arguyu d'identidá", manifestó.
Andalucía
