UVIÉU, 7 May. (EUROPA PRESS) -
El presidente del PP d'Asturies, Álvaro Queipo, calificó de "bandazu" la forma d'actuar del presidente del Gobiernu asturianu, Adrián Barbón, qu'anunció esta fin de selmana que diba citar a los grupos parllamentarios pa modificar l'Estatutu d'Autonomía ya incluyir la oficialidá del asturianu y del gallego-asturianu.
Nuna rueda de prensa n'Uviéu, Queipo dixo que'l dirixente socialista ye perfectamente conocedor de la postura del PP, contraria a la obligatoriedá. Ensin la participación del PP nun pue modificar l'Estatutu. Asina, Queipo cree que si Barbón plantea esti asuntu agora nun ye más que pa usar la llingua asturiana como "arma d'ataque y motivu de resquiebra", dalgo que reprochó al socialista.
Queipo dixo que la postura del so partíu sobre la llingua asturiana nun pue ser más clara. "Nun nos movimos un rispiu: promover el so usu y promoción dende la llibertá y ensin imposiciones, respetando la voluntariedá nel so usu y aprendizaxe; dicimos sí al asturianu y non a la obligatoriedá", indicó. "Asturianu sí, pero en llibertá", resumió la postura del so partíu.
Aprovechó la ocasión pa pidir esculpes en nome de la política asturiana pol "espectáculu" que se ta mostrando sobre les llingües asturianes y acusó a Barbón de volver utilizar la oficialidá del asturianu "pol so interés, pa esviar l'atención del fracasu de la so xestión".
Queipo recordó qu'esti asuntu foi protagonista la llexislatura pasada, cuando Barbón sí tenía más apoyos pa la oficialidá y nun lo fixo. A empiezos del presente mandatu, indicó que'l mesmu presidente asturianu dixo que'l tema de la oficialidá taba "muertu".
"L'oxetivu de Barbón nun ye la cooficialidá del asturianu y del eonaviegu, si lo fuese yá seríen llingües cooficiales dende la llexislatura pasada, cuando yá tuvo enguedeyando cola oficialidá del asturianu pa nada; cuando pudo facelo porque-y lo permitía l'aritmética parllamentaria, nun aprobó la reforma del Estatutu y proponlo agora que nun pue, y sábelo, pero porque cola llingua busca un elementu de distracción, crear barreres y que sía fonte d'ataque políticu al adversariu", dixo.
Nesti sentíu, el presidente popular destacó que por una cuestión de llexitimación democrática'l PP tien que ser coherente colo que se prometió a los más de 175.000 asturianos que votaron al partíu nes últimes elecciones democrátiques: "En nengún momentu prometióse reformar l'Estatutu d'Autonomía, y nun soi como Pedro Sánchez, nin tampoco como Adrián Barbón".
Queipo dixo que'l PP nun va negociar nenguna reforma del Estatutu d'Autonomía qu'implique la obligatoriedá de les llingües asturianes, y añadió que "l'asturianu y l'eonaviegu son un motivu d'arguyu p'Asturies que tenemos de promover y protexer; con un Gobiernu del Partíu Popular, les llingües asturianes van tar a salvo, tanto de quien les quieren desaniciar, como de los que quieren aprovechase d'elles con fines personalistes y partidistes".
"Nun tolos partíos foron igual de claros que'l Partíu Popular, y non toos son tan sinceros", y dixo que "los mesmos que queríen dicir quien yéramos demócrates y quien non, agora pretenden dicinos quién son asturianos bonos y quien non. Naide nos tien que dicir cómo sentinos asturianos, nin cómo asturianistes, y muncho menos el PSOE o Barbón".
El presidente del PP criticó que, con motivu del asturianu, ye la primer vez que'l líder de la oposición recibe una invitación formal de Barbón pa tratar un asuntu qu'afecte a Asturies, "y nun va ser porque pasaren poques coses nos meses que llevamos de llexislatura".
Nesi sentíu, citó que nun recibió llamada dalguna del presidente cuando negoció y aprobó la llei d'Impulsu Demográficu; o la llei d'Escueles de 0 a 3 años; cuando Sánchez pactó la so investidura col independentismu catalán "perxudicando a Asturies"; coles manifestaciones del campu; cola reforma "ensin previu avisu" de les árees sanitaries; colos retrasos de los trenes Avril, la "mentira" del vial de Xove o la "paralización nueva" del nuedu de Serín; cuando Arcelor dexó entever la posibilidá d'abandonar Asturies; cuando s'anunció'l zarru de Sekurit, o cuando Asturies "apaez como la rexón con menor tasa d'actividá d'España".
"Estos son los fechos de Barbón: dar al llombu a los problemes d'Asturies, fuxir del más mínimu consensu y nun cuntar nunca col principal partíu de la oposición; suponemos qu'agora atoparía la lluz pa treslladar l'imposible d'un modelu de cooficialidá amable que nun implique obligatoriedá", indicó.
Álvaro Queipo señaló que va dir a la xunta convocada por Barbón el 23 de mayu "por responsabilidá institucional, y tamién por interés, esperando que nesa xunta Barbón muestre'l so modelu d'oficialidá amable, "que nun nació entá'l ser humanu que la conoza".
Coles mesmes, afirmó que va asistir en representación de "l'Asturies sensata, l'asturianismu pragmáticu, de la rexón trabayadora que lleva 40 años esperando por respuestes que nunca lleguen, y que clama por un cambiu de camín na nuestra tierra, porque Barbón confirmó que yá nun ta en condiciones d'ufiertar nada a Asturies".
Andalucía
