El quintu númberu de la revista de lliteratura n'asturianu Formientu preséntase mañana na Selmana Negra de Xixón

UVIÉU, 17 de Xunetu (EUROPA PRESS)

El puestu de la editorial La Cruz de Grau na Selmana Negra de Xixón va acoyer mañana, sábadu 18, la presentación del númberu cinco de la revista de lliteratura moza n'asturianu Formientu, según informó la entidá al traviés d'un comunicáu.

Nel actu, que va celebrase de magar les 20.00 hores, van tar presentes César Santiago García, editor, y Benxa Pérez, escritor y miembru del conseyu de redacción de la revista, amás d'otros autores por confirmar.

El númberu 5 de la revista, que "busca asoleyar la obra de los autores más mozos de la lliteratura asturiana, dando a conocer a les nueves promeses de les nueses lletres", fala de dellos nuevos nomes de la lliteratura n'asturianu. Ente los mesmos, figuren Rubén Rey Menéndez, que vien col aval de dellos premios algamos, y de Javier Cubero de Vicente, conocíu pol so trabayu como hestoriador n'otres publicaciones. Amás, cuenta con otra llarga riestra d'autores, que vienen collaborando dende hai tiempu con Formientu y que muestren novedaes, como les traducciones del catalán d'Iván Cuevas, feches con tol procuru, y coles que la publiación abre una "estaya inesplorada", la de les tornes.

CONSEYU DE REDACCIÓN

Col oxetivu de "siguir meyorando na calidá lliteraria de la revista", los editores esplicaron que s'estrena "Conseyu de Redaición, que pasa a ser fixu, de la mano de la filóloga y escritora Laura Marcos, como coordinadora, l'editor César García Santiago, y l'escritor Bénxa Pérez. Un equipu que vien a da-y a la revista un trabayu d'analís y esbilla más fondu".

Formientu nació nel añu 2006, dirixida por Inaciu Galán y embaxo la edición de Xareos!, y dende entós vien publicándose con regularidá, axuntando, según los editores, "a los escritores más mozos del panorama asturianu actual". En 2008 Ediciones La Cruz de Grau asumió la xestión editorial de Formientu. La editorial prepara nesti momentu'l calendariu de presentaciones.