Refugada una proposición del PP que pidía la permanencia del profesoráu de Relixón

UVIÉU, 25 de Setiembre (EUROPA PRESS)

La Xunta Xeneral d'Asturies refugó, nuna votación por puntos, la proposición del PP sobre la garantía del derechu a la formación relixosa y permanencia del profesoráu de Relixón dientro del sistema educativu.

Dende'l PP proponíen "garantizar el derechu de les families a escoyer llibremente la formación relixosa de los sos fíos en toles etapes y ciclos del sistema educativu asturianu, como asina recueye la disposición adicional segunda de la Lomce". Esti primer puntu de la proposición, refugóse por 28 votos en contra, frente a 14 votos a favor y 3 astenciones.

La iniciativa tamién plantegaba "consensuar urxentemente un plan específicu colos representantes del profesoráu de Relixón que solucione los problemes xeneraos dientro del colectivu, poles últimes decisiones adoptaes pola Conseyería d'Educación del Principáu d'Asturies". Nesti apartáu fueron tamién 28 los votos en contra, frente 17 votos a favor.

De la mesma, decayó'l puntu terceru de la proposición, con 28 votos en contra frente a 14 a favor y trés astenciones, referente a "asegurar la permanencia y actividá de tolos profesores de Relixón dientro del sistema educativu públicu asturianu".

La proposición defendiérala la diputada del PP Susana López Ares, qu'apeló a la llibertá de les families y dio l'apoyu del so Grupu al colectivu de casi 200 profesores de Relixón. López Ares calcó en que se trata de "un derechu propiu de les families y non un derechu que tenga que dar l'Alministración". "Ye un derechu fundamental", afirmó, reclamando tamién que'l Gobiernu d'Asturies se reúna col comité d'empresa p'atender les sos demandes, en cuenta de facer "teatru".

C'S APOYÓ'L SEGUNDU PUNTU

Dende Ciudadanos, el so voceru Nicanor García, propunxo la votación por puntos pa dixebrar aspectos ideolóxicos de la parte llaboral y mostróse favorable a encamentar a la Conseyería retomar les negociaciones pa resolver los problemes del profesoráu. Ello ye que los trés parlamentarios de C's apoyaron el segundu puntu de la proposición y optaron por astenese nos apartaos primeru y terceru.

Pela so parte, el diputáu de Foru Argimiro Rodríguez recalcó na necesidá de llegar a acuerdos pa conxugar los intereses de la plantiya col interés xeneral ante'l riesgu de paru pa 40 profesores y anunció l'apoyu del so Grupu a la proposición del PP.

Tamién fueron favorables a buscar solución a la situación del profesoráu dende los grupos d'IU y Podemos, anque tanto los 5 diputaos d'IU como los 9 de Podemos refugaron los trés puntos de la proposición del PP, defendiendo la interculturalidá.

Na so intervención, la diputada socialista Elsa Pérez aprovechó pa culpar al PP de la "nociva y lesiva" nueva llei educativa, Lomce, añadiendo qu'otres comunidaes tienen menos hores lectives de Relixón qu'Asturies, onde se cumplen, asegura, los parámetros de la norma estatal nos ciclos nos qu'entró en vigor. De la mesma manera, xustificó'l refugu de los 14 diputaos del PSOE a la proposición, defendiendo les midíes adoptaes pol Principáu, que trabaya "con sensibilidá" p'acortar les consecuencies nel profesoráu, remarcando qu'esti mesmu vienres celebróse una xunta col comité d'empresa.

Amás, na sesión ordinaria d'esta mañana, la primera na que la Cámara cuenta con un marcador pa controlar los tiempos d'intervención de los grupos, aprobóse, por 25 votos a favor frente a 11 votos en contra y 9 astenciones, la proposición non de llei d'IU sobre midíes pa evitar la esclusión social. La Xunta encamienta asina al Executivu presentar ante la Cámara un plan de rescate social contra la probeza y la esclusión.