UVIÉU, 22 Mar. (EUROPA PRESS) -
Roberto Fernández Llera, Eduardo Rodríguez y Manuel Fueyo son los nomes propuestos pa renovar la Sindicatura de Cuentes y que, de nun haber sorpresa, van ser escoyíos nel plenu próximu de la Xunta Xeneral del Principáu d'Asturies.
Según fontes parllamentaries consultaes por Europa Press, los nomes propunxéronlos los grupos de PSOE, PP y IX, que sumen la mayoría necesaria de votos p'anovar l'órganu fiscalizador, que lleva en funciones dende xineru. Va ser na última sesión plenaria de la llexislatura cuando van ser escoyíos.
Les candidatures propunxéronles delles ampliaciones nel plazu, qu'acababa esti vienres. Finalmente'l PP optó pol conceyal nel Conceyu d'Uviéu Eduardo Rodríguez. Too apunta a que'l Síndicu Mayor va ser Fernández Llera (propuestu pol PSOE), mentes que Manuel Fueyo foi l'apueste d'IX. Cuando sían escoyíos, el mandatu va ser de seis años.
La Sindicatura de Cuentes, constituyida en 2005, ye l'órganu encargáu de fiscalizar l'actividá económico-financiera del sector públicu autonómicu y velar pola so adecuación a los principios de llegalidá, eficacia y eficiencia. Tamién-y correspuende asesorar en too rellacionar con materies de la so competencia a la Xunta Xeneral del Principáu d'Asturies y a les entidaes locales y, p'acabar, exercer les competencies que-y sían delegaes pol Tribunal de Cuentes.
