La Xunta Xeneral encamienta al Gobiernu central a crear les especialidaes docentes d'asturianu y gallego-asturianu

   UVIÉU, 18 Feb. (EUROPA PRESS) -

   El Grupu Socialista, Covadonga Tomé (Grupu Mistu) y Foro sofitaron esti miércoles la iniciativa de Convocatoria por Asturies IX-Más País-IAS qu'encamienta al Conseyu de Gobiernu a solicitar al Ministeriu d'Educación, Formación Profesional y Deportes la creación d'especialidaes docentes de llingües propies y a impulsar los trabayos necesarios pa la implantación de les especialidaes de Llingua Asturiana y Gallego-asturianu. La propuesta cuntó cola astención del Grupu Popular y el refugu de Vox.

   El voceru parlamentariu, Xabel Vegas, sorrayó nel Plenu de la Xunta Xeneral del Principáu que la iniciativa busca correxir una situación de precariedá llaboral qu'afecta a los docentes de les llingües propies del Principáu. "Nun tamos pidiendo un privilexu, sinón igualdá de derechos llaborales. Si l'asignatura esiste y los docentes esisten, lo que falta ye namás la ferramienta llegal", señaló, aportunando en que l'Estáu tien d'actualizar la normativa pa incluyir estes especialidaes y dar seguridá xurídica a el trabayadores.

   Mónica Ronderos (PSOE) defendió'l votu favorable del grupu socialista, destacando la implicación del Gobiernu del Principáu na promoción de les llingües propies y la creación de la especialidá docente. "L'apueste pola especialidá ye firme y decidida. Tenemos derechu a espresanos nes nueses llingües y garantizar la estabilidá llaboral de los docentes", sorrayó, asegurando que la iniciativa nun depende de la oficialidá de les llingües pa ser aprobada.

   Covadonga Tomé (Grupu Mistu) coincidió na necesidá urxente de crear la especialidá docente. "Votar sí ye votar pola xusticia llaboral, pola calidá educativa y pol cumplimientu de los compromisos asumíos. Nun pue tenese una asignatura normalizada con un profesoráu condergáu a la interinidá", afirmó, recordando que la especialidá ta amparada pol Estatutu d'Autonomía y la Llei d'Usu de 1998.

   "Trátase de terminar cola precariedá de más de 300 docentes y reconocer legalmente una especialidá que yá esiste na práctica", añedió'l voceru de Foro, Adrián Pumares, destacando qu'informes previos del Principáu respuenden por la competencia autonómica pa regular estes especialidaes dientro del sistema educativu.

   Dende'l PP, Gloria García alvirtió sobro les llendes llegales de la propuesta, recordando que la especialidá docente nun pue consolidase ensin la oficialidá del asturianu y gallego-asturianu. "Tamos énte un problema xurídicu: el Ministeriu condiciona la creación de la especialidá a la oficialidá. Vender esperances a los docentes ensin esto ye inxustu", indicó, anque matizó que la PNL respuende a un problema d'estabilidá llaboral.

   Pela so parte, Javier Jové (Vox) criticó la iniciativa, cuestionando la utilidá de la creación de la especialidá y calificando de "irrelevante" la demanda de los docentes. "Lo que nos traen ye un planteamientu pa blindase la plaza en propiedá en daqué que nun apurre nada a la sociedá asturiana", argumentó, aportunando en que los recursos públicos tendríen de dedicase a necesidaes educatives más xenerales.