Ecoloxistes consideren que'l Gobiernu asturianu ta "incapacitáu" pa la evaluación ambiental de la mina de Tapia

UVIÉU 3 Mar. (EUROPA PRESS) -

Coordinadora Ecoloxista d'Asturies consideró esti llunes que'l Gobiernu del Principáu ta anguaño "incapacitado" pa evaluar ambientalmente el proyectu de AsturGold pa esplotar una mina d'oru en Salave (Tapia). Según señalaron al traviés d'una nota de prensa, la conseyera de Fomentu del Principáu, Belén Fernández, "nun ye independiente" y convirtióse en "vocera" de la empresa minera coles sos "bochornoses declaraciones".

Según señalen los ecoloxistes al traviés d'una nota de prensa, la empresa minera "sigue ensin esmolecese pol mediu ambiente, apueste por llograr un beneficiu rápidu, pa dexanos les borrafes dempués de la esplotación, eso si cola complicidá del Gobiernu d'Asturies que mira pa otru llau, como fixo con otros proyectos mineros".

Recordaron que la Confederación Hidrográfica del Cantábricu considera que l'estudiu d'impactu ambiental del proyectu mineru de Salave nel conceyu de Tapia que tuvo a información publica les pasaes selmanes, tien graves defectos.

"El proyectu presentáu pola empresa pal estudiu tien un cúmulu de defectos ya irregularidaes que imposibilitan tomase en serio el trabayu presentáu", concluyeron, alvirtiendo que'l Gobiernu d'Asturies nun puede convertise en "consentidor".