Gizon bat atxilotu dute Bilbon, bikotekide ohiak 'Erastop' aplikazioarekin alerta mezua jo ondoren

BILBOKO UDALA

BILBO 19 May. (EUROPA PRESS) -

Bilboko Udaltzaingoko agenteek gizonezko bat atxilotu zuten joan den asteazkenean, bere bikotekide ohiak 'Erastop' aplikazioarekin alerta mezua jo ondoren.

Bilboko Udalak jakinarazi duenez, asteazkeneko 18:00ak jota zirela, 'Erastop' aplikazioaren bidez helarazitako abisu bat jaso zuen udaltzaingoak aginte eta kontrol zentroan.

Mezua jaso ondoren abisua eman zitzaioen patruilei, eta haietako batek aurkitu zuen biktima, seme adingabearekin batera, Zabalburu plazaren inguruan. Emakumeak agenteei adierazi zien bere bikotekide ohia atzetik ibili zitzaiela eta jazarri egin zituela, emakumearen kontrako irainak eta mehatxuak botaz, urruntze agindua indarrean zuen arren.

Udaltzainek irrati bidez eman zieten egitateen berri gainerako patruilei, ustezko erasotzailea lokalizatzeko. Handik laster, patruila batek Hurtado Amezaga kalean aurkitu eta atxilotu zuen gizona, zigorra haustearen delitu baten ustezko egile gisa.

Egitateak izan ziren lekuraino joan ziren Biktimei Laguntzeko eta Babesa emateko Ikuskaritzako bi agentek emakumeari lagundu zioten, eta prozedura osoan zehar haren ondoan izan ziren.

Bilboko Udaltzaingoak gogorarazi du 'Erastop' aplikazio mugikorra doakoa dela eta bere alerta sistemak aukera ematen duela eraso matxistak salatzen dituzten emakumeak geolokalizatzeko eta polizia baliabideak berehala bidaltzeko.