SANTIAGO DE COMPOSTELA 11 Jul. (EUROPA PRESS) -

A Consellería de Economía e Industria destinará 5,25 millóns de euros a financiar unidades de I+D e investimentos innovadores de empresas galegas, unha axuda que supón, como principal novidade, a posibilidade de anticipar os beneficiarios ata o 80 por cento da contía da prestación.

Estas axudas, que forman parte do Programa de Innovación Empresarial do Plan Galego de I+D+i 2006-2010 --INCITE--, teñen como obxectivo incrementar a capacidade innovadora das empresas galegas subvencionando a adquisición de recursos materiais e a mellora de centros produtivos relacionados con actividades I+D+i.

Con esta posibilidade, subvencionaranse os investimentos que permitan a diversificación da produción con novos e mellorados produtos ou servizos que supoñan unha transformación fundamental no proceso global de produción, incluído os dirixidos especificamente a incrementar a capacidade tecnolóxica e innovadora da empresa.

Os beneficiarios das subvencións son as empresas galegas en dúas modalidades, en función do tipo de empresa solicitante --pequenas e medianas empresas ou grandes empresas-- . As concesións en ambas as dúas liñas poden alcanzar ata o 30 por cento do custo subvencionable para as de maior tamaño, o 40 por cento para as medianas e o 50 por cento para as máis pequenas, sen superar en ningún caso os 1,5 millóns de euros.

Ademais, teñen unha única anualidade e soamente se admitirán aqueles gastos realizados entre a data de presentación da solicitude e a data de límite de xustificación. Ambas as dúas están cofinanciadas con fondos FEDER.