O proxecto realízase en condicións de agricultura ecolóxica, aínda que os resultados son aplicables a explotacións convencionais

SANTIAGO DE COMPOSTELA, 8 May. (EUROPA PRESS) -

Un equipo do Consejo Superior de Investigacións Científicas (CSIC) traballa para recuperar e promover o uso de variedades autóctonas de millo para uso panificable, isto é, para a produción de fariñas e produtos tradicionais como pan, empanadas, tortas ou bicas. O estudio lévase a cabo conxuntamente coa empresa Promotora Orxeira (Ourense) e ten unha duración de tres anos, aínda que a colaboración entre ambas as dúas entidades se remonta a 1999.

Os investigadores da empresa e a Misión Biolóxica de Galicia (CSIC) perseguen o deseño dun sistema completo de procesado, tratamento e conservación do gran e a fariña de millo que faga rendible a súa comercialización a escala industrial. "A fariña que actualmente atopamos está feita a partir de millo híbrido, xeralmente americano. O noso obxectivo é poñer no mercado fariña feita a partir de variedades autóctonas galegas e promover así a súa recuperación", explica Pedro Revilla, responsable do equipo da Misión Biolóxica.

A iniciativa lévase a cabo con tres variedades autóctonas, seleccionadas a partir dun estudio anterior no que destacaron polas súas boas calidades harineras: Rebordans (variedade branca), Sarreaus (amarela) e Meiro (negra). As tres serán plantadas en senllos terreos de Lobeira e Muiños -propiedade da promotora Orxeira- e tras a súa recolección o gran será sometido a diversos métodos de secado, procesado, conxelado e almacenamento co fin de avaliar qué combinación de tratamentos asegura unha mellor conservación.

Trátase de ver como cada tratamento inflúe nos danos por insectos, a proporción de xerminación, a abundancia de fungos, a densidade e dureza do gran, a súa humidade e a presenza de danos no pericarpo. Tamén se analizará se as condicións ambientais da recolección (humidade e temperatura) inflúen na conservación do gran. Cos resultados elaborarase un protocolo de tratamento e conservación que garanta a calidade e salubridade do millo e permita a súa explotación industrial.

AGRICULTURA TRADICIONAL.

A partir do millo así conservado elaboraranse produtos tradicionais (bicas, pan, empanadas) e traballarase sobre un sistema de envasado, similar ao das semiconservas, que permita mantelos en bo estado durante o maior tempo posible. Para avaliar a súa eficacia, realizaranse catas na sede da Promotora Orxeira.

Todo o estudio se leva a cabo en condicións de agricultura ecolóxica, aínda que os resultados son aplicables a explotacións convencionais. O proxecto podería ser ademais unha solución para as numerosas explotacións agrarias abandonadas en Galicia, "aínda que cultivar millo de xeito ecolóxico non sería rendible por si só, si pode selo se se complementa coa venda de fariña ou a elaboración de produtos artesanais", explica Arsenio Landa, de Promotora Orxeira.

Dende a súa introdución a finais do Século XV o millo foi un cultivo tradicional en Galicia e o norte de Portugal, zonas sen trigo nas que desprazou rapidamente ao paínzo como cereal panificable. De feito, o millo está fortemente enraizado na tradición gastronómica galega. Actualmente as variedades galegas de millo apenas se usan, xa que foron substituídas por híbridos comerciais importados de Norteamérica, que aínda que de peor calidade, son máis produtivos. Mediante este proxecto quérese dar alternativas aos agricultores que fomenten o uso de variedades propias.