A estrutura regúlase ata a altura dunha persoa "en só un minuto" co fin de aumentar a seguridade tras 5 anos de estudios

SANTIAGO DE COMPOSTELA, 28 Mar. (EUROPA PRESS) -

A empresa galega Morpholab deseñou un farol que emprega iluminación de baixo consumo e é "única no mundo", xa que é capaz de repregarse sobre si mesma para facilitar a súa limpeza así como a súa conservación.

En declaracións a Europa Press, o xerente de Morpholab, Fernando Rioboo, subliñou que a luminaria deste poste de luz é capaz de trasladarse de xeito vertical ata a altura dunha persoa para que poida manipulala e limpala. Todo iso, grazas a un sinxelo mecanismo que se atopa na caixa de rexistro para despois "volver elevala ata os oito ou dez metros", explicou.

Ata agora para o mantemento dun farol necesitábase unha escaleira especial ou un coche dotado dun cesto para que o operario puidese cambiar as lámpadas. Segundo apuntou Rioboo, isto leva consigo que "non se faga un coidado axeitado de limpeza", xa que non se teñen en conta humedades ou insectos que se introducen no dispositivo, algo que se traduce nunha "iluminación deficiente".

Para ilustrar en que consiste este novidoso mecanismo, Fernando Rioboo compara a concepción deste sistema co "dunha antena telescópica de automóbil para escoitar a radio", onde a punta da antena sería aquí de onde sae o feixe de luz. Esta concepción manipulable da estrutura supón "un aforro en man de obra", así como un descenso na perigosidade, xa que permitirá non ter que empregar valla ou sinalizacións en estradas.

Esta armazón leva unha iluminaria baseada en tecnoloxía LED, que permiten unha menor disipación de calor, o que dá lugar a un aforro "elevado", segundo explicou Rioboo, respecto a unha iluminación tradicional de vapor de sodio ou de mercurio que "aínda existe en máis do 90% das rúas", apuntou.

EN SÓ UN MINUTO

Segundo sinalou a Europa Press o xerente de Morpholab a estrutura é capaz de baixar por completo "en tan só un minuto", grazas ao cal o proceso de acondicionamento e limpeza do poste luz se pode realizar nuns dez minutos coa consecuente volta ao estado de orixe.

A empresa que evolucionou este sistema cos seus propios recursos atópase nestes momentos en contacto con diversas empresas de Galicia, Cataluña e Madrid para sacar ao mercado un produto que estiveron a desenvolver durante os últimos cinco anos.

RENDIBILIDADE

O prezo da estrutura deste farol supón un custo dun 20 por cento maior que un poste de luz convencional, aínda que Rioboo fixo fincapé en que a través do seu mantemento se "rentabiliza por completo".

Esta empresa está formada por un grupo de arquitectos e deseñadores gráficos que realiza deseños de mobiliario, así como de diferentes elementos. Na actualidade, traballan seguindo dúas pautas, por un lado mediante a creación de proxectos propios que despois poñen á venda os fabricantes; mentres que por outra banda, se pode dar o caso de que sexan os fabricantes os que demandan un proxecto.

Así mesmo, Rioboo recalcou que a empresa traballou unha estética atractiva "dentro do que é posible nun poste de iluminación". De feito, a compañía está formada por un grupo de arquitectos e deseñadores gráficos que realiza deseños de mobiliario así como de diferentes elementos.