Quintana aposta por "blindar" a Galicia de crises futuras cun modelo que "cambie a economía do cemento pola de coñecemento"

SANTIAGO DE COMPOSTELA, 21 Jul. (EUROPA PRESS) -

A Xunta aspira a que os cincos parques tecnolóxicos e científicos de Galicia acollan no ano 2012 unhas 550 empresas, que xeren ao redor de 6.600 empregos directos, tras unha inversión programada de 435 millóns de euros.

Así o avanzou hoxe o vicepresidente do Goberno autonómico, Anxo Quintana, quen, en compañía dos conselleiros de Innovación, Fernando Blanco, e de Vivenda, Teresa Táboas, asegurou que esta comunidade "debe buscar un modelo competitivo, baseado na diferenciación, a tecnoloxía, a calidade e a seguridade dos produtos propios".

O Parque Tecnolóxico de Galicia (Tecnópole), situado en San Cibrao das Viñas (Ourense), actuará como coordinador destes entes. Na actualidade conta con 550.000 metros cadrados e ata 2012 a estimación é amplialos en 430.000, para acoller en total 180 empresas.

Outras instalacións serán a Cidade Tecnolóxica de Vigo (Citexvi), que albergará 350.000 metros cadrados, un centenar de empresas e 1.000 empregos; e o Parque Tecnolóxico de Lugo, cunha previsión de 300.000 metros cadrados de superficie, 100 sinaturas e 600 postos de traballo.

Ademais, o Parque Tecnolóxico de Santiago de Compostela disporá de medio millón de metros cadrados para acoller un centenar de entidades e xerar un millar de empregos; mentres que o da Coruña terá 300.000 metros cadrados, nos que se asentarán 100 empresas con 1.000 postos de traballo creados.

INTEGRACION A FINAIS DE ANO

En outubro procederase á constitución formal da rede, que inicialmente incluirá os tres primeiros parques xa creados: a Tecnópole e as instalacións de Vigo e A Coruña. A finais de ano integraranse os dous restantes (Santiago e Lugo), coincidindo coa creación dos seus entes xestores.

O obxectivo é que estes parques se complementen entre si e atendas de xeito prioritario aos sectores produtivos máis vinculados con cada zona, nunha estratexia de reequilibrio e cohesión territorial.

Ademais, a rede seguirá aberta á incorporación de novos parques, sempre e cando reúnan as condicións de dinamizadores do I+D empresarial do seu ámbito. Este chan tecnolóxico presenta un valor engadido respecto ao empresarial convencional polo seu efecto multiplicador.

Anxo Quintana destacou a importancia de "cambiar a economía do cemento pola do coñecemento", sobre todo neste momento "de crise", cando "se"sofren as consecuencia dun modelo sostido polo mercado inmobiliario".

Por iso, apostou por que "Galicia se blinde contra crises futuras" deste tipo, "cun modelo máis sólido e diversificado" no que "a inversión inmaterial" gañe terreo e "cun papel fundamental" da rede de parques tecnolóxicos e científicos.