Participan "a partes iguais" investigadores de todas as universidades galegas e doutros países

SANTIAGO DE COMPOSTELA, 27 May. (EUROPA PRESS) -

A "primeira" revista en formato electrónico da Universidade de Santiago de Compostela (USC), 'Estudos de Lingüística Galega' (ELG), pretende "afianzarse como un espazo de debate e intercambio científico da lingua galega".

Así, a directora da publicación e do Instituto de Lingua Galega (ILG), Rosario Álvarez, destacou hoxe en rolda de prensa o obxectivo de que a publicación supoña "un vehículo de difusión instantánea, nacional e internacional do galego" no que participan "a partes iguais" investigadores --directa e indirectamente relacionados co idioma-- noveis e consagrados do ILG, o resto de universidades galegas e doutros países.

Neste sentido, Álvarez explicou que ELG nace como unha revista "complementaria" a outras dedicadas á filolóxica galega con "vocación integradora" no "equilibrio deste ciclo de revistas", como os cadernos da lingua da Real Academia Galega ou a revista filolóxica da Universidade da Coruña.

Así mesmo, outro dos obxectivos da publicación será representar un lugar de reflexión sobre a normativa idiomática e de análise crítica e de difusión da investigación lingüística. "Realizar unha visión crítica da produción en Galicia e atender á calidade que que rexen as publicacións científicas", valorou Álvarez.

A revista, da que se editarán 300 exemplares en papel para "asegurar que as universidades dispoñan dela", estrutúrase nas seccións 'Pescuda' --artigos de investigación orixinais e libres sobre lingüística--; 'Peneira' --artigos breves que supoñan unha reflexión sobre o estándar e realicen propostas--; e 'Anada', que recompila recensións críticas sobre traballos editados neste campo que afecten directa ou indirectamente ao galego.

"AMBICIÓN DE CONSOLIDARSE"

Pola súa banda, o reitor da USC, Senén Barro, que tamén participou hoxe na presentación da publicación, considerou que a revista nace cunha "ambición de inicio e un risco" pero coa vocación de "consolidarse" e "abrir un camiño inédito" na institución educativa.

Así, avogou por "facer gala do bo uso das novas tecnoloxías" e que a USC "se poña á cabeza" neste campo para "facilitar o traballo aos que veñen detrás" e que "os que publican vexan recoñecido o seu traballo e o seu esforzo".

Finalmente, destacou o formato dixital como unha oportunidade "para chegar a todo o mundo que queira acceder" aos contidos e avances, pero recordou que é necesario "usar axeitadamente" estes soportes ante a posibilidade de "ser contraproducentes".

NOVOS RETOS

Por outro lado, Álvarez recoñeceu que a investigación en materia lingüística está "nun bo momento" aínda que "precisa de novos retos" para "garantir a súa difusión máis alá do que se fixo nos últimos anos" e "dar un salto" para chegar "a xente que ata descoñece a existencia do galego".

Por iso, avogou pola "internacionalización lingüística" e a "innovación tecnolóxica" como aplicación ao estudio e difusión do idioma.