VIGO, 17 Abr. (EUROPA PRESS) -

A Universidade de Vigo e o grupo Tragsa asinaron hoxe un convenio de colaboración para o desenvolvemento conxunto de programas de investigación e desenvolvemento tecnolóxico, aplicados a ámbitos como a ordenación do territorio, a xestión forestal ou o deseño de infraestruturas agrarias, entre outros.

Segundo informaron fontes da Universidade viguesa, o acordo, subscrito polo reitor da Universidade, Alberto Gago, e o presidente das sociedades do grupo Tragsa, Rafael Jaén, non só permitirá a cooperación interinstitucional en materia de investigación, senón tamén en canto a formación de profesionais e organización conxunta de masters, bolsas e fomento da contratación de alumnos con titulación concretas, como as de enxeñeiros de montes ou agrónomos, veterinarios e economistas.

Alberto Gago subliñou que o traballo conxunto entre Universidade e Tragsa poderá desenvolverse en campos como o deseño de infraestruturas agrarias, ordenación do territorio, economía agraria, acuicultura, medio ou xestión forestal.

De feito, o propio responsable de Tragsa recordou que o traballo deste grupo de empresas públicas, que dá traballo a 20.000 persoas en España (das que 4.500 son titulados superiores) desenvólvese en ámbitos como a pesca, o desenvolvemento rural, a concentración parceira, os servizos de emerxencia, como os prestados tras a catástrofe do Prestige, ou a conservación da natureza.