Desactivada a alerta por proximidade a vivendas no incendio do Riós (Ourense), que calcina 30 hectáreas

   OURENSE, 16 Ago. (EUROPA PRESS) -

   A Consellería do Medio Rural desactivou a situación 2 declarada polo incendio forestal do Riós (Ourense), que calcina unha superficie de 30 hectáreas. Esta alerta operativa foi decretada na tarde do sábado como medida preventiva ante a proximidade ao núcleo de poboación de Fumaces.

   O lume iniciouse ás 16.54 horas do propio sábado entre as aldeas de Fumaces e de Feilas, aínda que en dirección á primeira. O punto de orixe estaba "preto" da N-525, segundo especifica a alcaldesa, Eva Barrio. Ao redor das 21.00 horas, Medio Rural situou a superficie afectada en 20 hectaréas, unha estimación provisional que esta mañá elevou a 30.

   En palabras da rexedora, a situación quedou "controlada" durante a madrugada, sobre as 01.30: "Xa non hai ningún risco". O momento de maior preocupación do lume deuse a metade da tarde debido á situación meteorolóxica dun día de altas temperaturas na zona. De feito, os sinais da DXT na estrada que leva ao Riós avisaban do risco "extremo" por incendio.

   Durante a tarde, o vento complicou a súa extinción provocando "moitísimo fume" e que o incendio avanzase cara á aldea de Fumaces, onde puxo en risco a unha vivenda, segundo concreta a rexedora. Ademais, o lume situouse ao límite con Vilardevós, aínda que finalmente non chegou a pasar cara a leste outro municipio ourensán.

   A Xunta mobilizou para a súa extinción por agora a dous técnicos, 12 axentes, 17 brigadas, 13 motobombas, tres pas, tres helicópteros e sete avións. Tamén acudiu unha brigada da BRIF de Laza, dependente do Minsiterio para a Transición Ecolóxica (Miteco). Así mesmo, numerosos veciños saíron a frear as chamas cos seus propios medios para tentar defender as vivendas, como no caso da aldea da Trepa.

O INCENDIO DE LOUSAME SEGUE ESTABILIZADO

   Ao mesmo tempo, permanece estabilizado o incendio forestal rexistrado no concello coruñés de Lousame, parroquia de Lesende, desde as 08.43 horas do sábado.

   Este lume comezou sobre as 17.32 horas do venres e, segundo as estimacións provisionais, afecta a unha superficie de arredor de 20 hectáreas, unha cifra que non variou desde a súa última actualización na tarde do venres.

   Para a súa extinción mobilizáronse, por agora, dous técnicos, 18 axentes, 27 brigadas, 22 motobombas, tres pas, unha unidade técnica de apoio, nove helicópteros e catro avións.