Medallas Pardo Bazán 2025: a olímpica Teresa Portela, a exconselleira Manuela López Besteiro e a Policía Autonómica

   SANTIAGO DE COMPOSTELA, 11 Jul. (EUROPA PRESS) -

   A deportista olímpica Teresa Portela, a que foi conselleira de Familia, Muller e Xuventude con Manuel Fraga, Manuela López Besteiro, e a Unidade de Policía Nacional Adscrita de Galicia recibirán as Medallas Emilia Pardo Bazán 2025, recoñecemento que outorga a Xunta a persoas e entidades que loitan por unha sociedade máis igualitaria e contra a discriminación por xénero.

   O Goberno galego anunciou este venres o galardón, que leva o nome dunha escritora que foi "precursora na defensa dos dereitos das mulleres e do feminismo", a través dunha resolución publicada este venres no Diario Oficial de Galicia.

   Teresa Portela, que acumula na súa dilatada carreira múltiples medallas europeas e mundiais, entre eles unha prata nos Xogos Olímpicos de Tokio, recibirá a Medalla Emilia Pardo Bazán por ser "todo un referente consolidado na defensa dos dereitos das mulleres e á hora de dar visibilidade ao papel do deporte feminino".

   Ademais, o xurado destaca "o seu esforzo e dedicación ao longo destes anos, rompendo barreiras sociais", e por mostrar ás novas xeracións "a importancia da igualdade en todos os campos da sociedade".

   Pola súa banda, Manuela López Besteiro, conselleira de Familia, Muller e Xuventude entre 1993 e 2002, foi recoñecida polo seu "labor fundamental para reivindicar os dereitos das mulleres e dar visibilidade á importancia da conciliación e da corresponsabilidade como garantía dunha sociedade máis igualitaria".

   Mentres tanto, a Unidade de Policía Nacional Adscrita de Galicia (UPA), coñecida tamén como Policía Autonómica, é a encargada de protexer ás vítimas de violencia de xénero e forma parte do sistema 'Viogen'. O xurado pretende enxalzar o seu traballo diario "acompañando a todas estas mulleres e representando un papel destacado tamén na súa recuperación".