Rueda volve "satisfeito" de China pola súa "intensa" axenda de reunións co sector da automoción e a eólica

1081658.1.260.149.20260426113610

   SANTIAGO DE COMPOSTELA, 26 Abr. (EUROPA PRESS) -

   O presidente da Xunta, Alfonso Rueda, finalizou a viaxe oficial a China emprendido o pasado xoves e regresa a Galicia "satisfeito" coa "intensa" axenda de reunións mantidas con representantes dos sectores da automoción e a enerxía eólica e de operadores turísticos.

   "Quedaron atrás días de moitas reunións, de moitas visitas e de moito traballo", valorou Rueda nun vídeo gravado nun tren chinés de alta velocidade de camiño a Pequín, desde onde collerá o avión de volta a Galicia. A súa estancia estivo centrada en situar a Galicia como un "destino preferente" para o investimento industrial e o turismo internacional.

   Un dos eixos centrais da viaxe, no que Rueda estivo acompañado pola conselleira de Economía e Industria, María Jesús Lorenzana, foron as reunións con empresas líderes no sector da automoción --como SAIC Motors--, ás que lles asegurou que "investir en Galicia é moi boa idea e merece moito a pena".

   O titular do Executivo galego trasladou aos directivos chineses as vantaxes competitivas de Galicia, entre as que destacou a "solvencia" da industria auxiliar e a "estabilidade institucional" como alicerces para atraer novos proxectos.

   A axenda tamén incluíu unha xunta coa empresa Goldwind sobre enerxías renovables, un ámbito no que --en palabras de Rueda-- "Galicia ten un enorme potencial" a nivel hídrico e eólico e no que aspira a ser líder.

   No ámbito turístico, a delegación galega mantivo estes días encontros con importantes operadores do país asiático. O obxectivo prioritario foi reforzar Galicia como destino e, de maneira especial, promocionar o Xacobeo 2027, que será "histórico", segundo o presidente galego.