O escritor Xosé Carlos Caneiro ofrecerá o próximo xoves un recital poético en Vigo acompañado por frauta e guitarra

VIGO 19 Sep. (EUROPA PRESS) -

O escritor Xosé Carlos Caneiro ofrecerá o próximo xoves ás 20.00 horas na Sala de Conferencias do Centro Cultural Caixanova un espectáculo baixo o título 'De bar en bar (Os poemas prohibidos)', no que se recitarán 22 poemas que falan de amor, resistencia, entusiasmo, paixón ou melancolía, e a entrada da cal é gratuíta.

Esta obra supón o regreso de Caneiro á poesía e ao panorama literario que deixou en 2003, tras escribir a novela 'Ámote'. Neste caso, recitará 22 poemas acompañado por José Manuel Salgado á guitarra, e por Manolo Garrido á frauta, ambos os dous compositores da maioría dos temas, que se inspiraron en influencias clásicas e contemporáneas.

Xosé Carlos Caneiro naceu en Verín en 1963 e a súa obra narrativa foi distinguida cos galardóns máis relevantes das Letras Galegas, entre eles, o premio Blanco Amor e Eixo Atlántico por 'Ébora', 'Premio Xerais de novela por 'O infortunio da soidade'', Premio García Barros de novela por 'Talvez melancolía', Premio Risco de Literatura Fantástica por 'A rosa de Borges', Premio Torrente Ballester, Nacional da Crítica e finalista do Nacional de Literatura por 'Un xogo de apócrifos'. Como poeta obtivo os premios Celso Emilio Ferreiro, Xohán Carballeira, Cidade de Ourense e Rosalía de Castro.

As súas obras foron traducidas a varias linguas, entre elas ao alemán, ao coreano ou ao español. As súas últimas creacións son 'Jorge Luís Borges', publicada por Espasa Biografías e a novela 'Ámote', editada en Galaxia, ambas as dúas en 2003; en agosto de 2006 acaba de publicar, na mesma editorial, a obra de ensaio 'Os dominios de Caín'.