A Asociación de Empresas das Artes Escénicas de Galicia reclama unha política teatral para "a estabilidade dos actores"

SANTIAGO DE COMPOSTELA 15 Jun. (EUROPA PRESS) -

A Asociación de Empresas das Artes Escénicas de Galicia 'Escena Galega' reclamou hoxe a creación dunha política teatral para acadar a "estabilidade" das compañías de teatro, que lles dará aos actores a mesma "estabilidade".

Segundo manifestou hoxe no acto de presentación desta asociación o seu presidente, Celso Parada, "hai que facer moito máis", e criticou as accións puntuais "efémeros" como a Feira das Artes Escénicas, coa que 'Escena Galega' se mostrou en desacordo

Neste sentido, o vicepresidente, Xosé Manuel Rabón, subliñou que "a unión fai a forza", polo que fixo un chamamento ás compañías teatrais a asociarse a 'Escena Galega', que xa conta con 28 compañías teatrais, para seguir o mesmo camiño para conseguir os obxectivos da asociación.

Ademais, apuntaron que tamén se podería ter en conta a constitución dunha patronal do teatro, coma noutras profesións, para a defensa dos intereses das compañías e co fin de buscar a estabilidade laboral e artística.

Parada indicou que neste momento "hai un goberno amigo", polo que se debe "romper co teatro da supervivencia" e crear unha política teatral "tan cacarexada xa" que convirta o sector teatral nun ámbito estratéxico dende o punto de vista cultural.

A presentación de 'Escena Galega', que se constituiu hai tres meses, fíxose no marco da celebración da XIV Feira das Artes Escénicas que se celebra durante esta semana en Santiago de Compostela.

FEIRA DE TEATRO

A feira, que rematará o sábado, acolle distintas representacións en sete escenarios da cidade compostelana, entre os que se topan o Teatro Principal, a Sala Yago, a Sala Nasa, e o Teatro Galán. Ademais, no transcurso da celebración deste evento realizáronse as presentacións públicas de distintos proxectos, asociacións e espectáculos.

Entre as actividades previstas para mañá se atopa un ciclo de obras teatrais dende as 10.30 horas, coa representación de 'Tic,tac, sons dunha nave', a cargo do Teatro Buratini; ata 'A raíña da beleza de Leenane', da compañía Teatro Atlántico, que pechará a xornada ás 22.15 horas.

O público non acreditado poderá asistir a estas representacións en función das localidades dispoñibles e por un prezo de 3 euros. A venda de localidades estará aberta unha hora antes no caso do Salón Teatro e Teatro Principal, mentres que a Sala Nasa, Sala Yago e Teatro Galán, abrirán as billeteiras cinco minutos antes.