Educación investirá máis de oito millóns de euros en obras en centros de catro localidades galegas

SANTIAGO DE COMPOSTELA 8 Ago. (EUROPA PRESS) -

A Consellería de Educación e Ordenación Universitaria publicou hoxe no Diario Oficial de Galicia (DOG) a licitación, polo sistema de concurso e procedemento aberto, para a contratación da obra de construción de dous centros de ensino galegos e de obras de mellora noutros dous centros da comunidade, que contan cun orzamento base de licitación de 8.185.387,8 euros.

Así, a Administración educativa galega executará a obra de construción dun novo Instituto de Educación Secundaria (IES) en Brión (A Coruña) achegando 3.236.433,11 euros. O prazo de execución desta obra é de 12 meses.

Por outra banda, executarase a reforma e acondicionamento do Colexio de Educación Infantil e Primaria (CEIP) Curros Enríquez, de A Coruña. Esta actuación conta cun orzamento base de licitación de 373.260,29 euros e un prazo de execución de cinco meses.

Ademais, Educación acometerá a construción dun CEIP na Valenzá de Barbadás (Ourense). Nesta actuación, que conta cun prazo de execución de 12 meses, o departamento educativo autonómico inviste un total de 3.141.518,45 euros.

Educación levará a cabo tamén a obra de ampliación do CEIP de Cangas (Pontevedra). Con esta actuación, que contará con 1.434.176,16 euros, a administración trata de resolver as necesidades actuais deste centro mediante a demolición de dous pabellóns para situar no seu lugar un aulario de seis unidades de infantil e outras seis de primaria, así como unha aula de usos múltiples e dúas para pequeno grupo, cos correspondentes anexos necesarios. Tamén realizarase melloras sobre os edificios existentes. A obra conta cun prazo de execución de 12 meses.