SANTIAGO DE COMPOSTELA, 5 Abr. (EUROPA PRESS) -
O documental 'O camiño antigo' no que participaron 14 estudantes de Xornalismo da Universidade de Santiago (USC) recibiu unha medalla de prata nos Premios Malofiej na categoría de reportaxes multimedia de Cultura, espectáculos, gastronomía e estilo de vida que convoca o Capítulo Español da Society for News Design e a Facultade de Comunicación da Universidad de Navarra.
O documental multimedia premiado recrea distintas facetas da Galicia máis vinculada ao mundo tradicional, estruturado en grandes historias que mesturan fotografías, audio, texto, vídeo e infografías. 'O camiño antigo' foi realizado en xullo de 2005 por estudantes da Facultade de Ciencias da Comunicación da USC e alumnos da Universidad de Los Andes (Chile) e de Norh Carolina at Chapel Hill (EE.UU.).
Pola USC participaron Gracia Pablos, Sergio Irigoyen, Silvia Canabal, Juan Castro, Anxa Correa, Anxela Chillón, Marcos Ferro e Paulino Vilasoa que, baixo a dirección de Xaquín González e Alberto Cairo. Estes se encargaron de realizar ao redor dunha ducia de infografías que recrean desde o funcionamento dunha batea ou do botafumeiro ata como se xoga á chave e se toca unha zanfona, pasando pola reprodución infográfica dos instrumentos musicais do Pórtico da Gloria, a maneira de desenvolverse a rapa das bestas ou a reconstrución en tres dimensións do Mosteiro de Samos.
Xunto a eles estiveron tamén Celia Fernández, Fátima Frieiro, Pablo Fernández, Jessica Beiroa, Mercedes Vega e Teresa de la Hera que centraron o seu labor nos apartados de audio, vídeo e redacción. A iniciativa supuxo a posibilidade de traballar cun equipo de profesores e profesionais expertos no ámbito das tecnoloxías dixitais, da fotografía, do deseño e da infografía.
Así, formaron parte do grupo os fotógrafos Rich Beckman (UNC), Bonnie Jo Mount (News&Observer) e Pat Davison, membro do equipo do xornal estadounidense Rocky Mountain News que conseguiu un premio Pulitzer pola cobertura dos asasinatos no instituto Columbine; os infografistas Alberto Cairo e Xaquín González, deseñadores como Laura Ruel (UNC e SND), e profesores da USC como Xosé López e Berta García.
O xurado internacional, presidido por Steven Komives, subdirector de Deseño do diario estadounidense Orlando Sentinel, concedeu 12 medallas de ouro, 28 de prata, 49 de bronce e dúas mencións. A esta XIV edición dos Premios Internacionais Malofiej de Infografía concurriron 1.403 traballos enviados por 111 medios de 18 países, o que supón un incremento dun 5% con respecto á edición anterior, especialmente significativo no apartado dos traballos en liña, bloque no que participaron os alumnos da USC.
