Letras Galegas.- A manifestación para reclamar un novo estatus para o galego reúne a máis de 3.000 persoas en Santiago

SANTIAGO DE COMPOSTELA 17 May. (EUROPA PRESS) -

A manifestación convocada pola Mesa pola Normalización Lingüística en Santiago de Compostela para reclamar un novo estatus para a lingua galega reuniu a máis de 3.000 persoas, que se concentraron na Alameda compostelana, de onde partiu, para pedir que a reforma do Estatuto permita recoñecer á lingua galega "o dereito de uso" e o "deber de coñecela".

Entre as personalidades que se deron cita, representantes moitas delas das 130 entidades que apoian a mobilización, figuraba o portavoz nacional do BNG e vicepresidente da Xunta, Anxo Quintana; os tres conselleiros nacionalistas da Xunta, todos a excepción da titular de Cultura, Ánxela Bugallo, que se atopaba na celebración institucional do Día das Letras Galegas en Sada; ou o ex líder do Bloque, Xosé Manuel Beiras.

En declaracións aos medios, Quintana considerou que o de hoxe é "un día para deixar de chorar, estar orgullosos da lingua e comprometerse coa súa utilización". Neste senso, admitiu que queda "moito traballo por facer", pero aclarou que "o que se fai é positivo" e, por iso, reclamou "paciencia" para acadar a normalización. "Nun mundo globalizado somos alguén cunha identidade e a identidade vén pola lingua.", engadiu.