Os conservatorios superiores de música de Vigo e A Coruña ofrecen un monográfico con motivo do 250 aniversario de Mozart

SANTIAGO DE COMPOSTELA 25 Feb. (EUROPA PRESS) -

Os alumnos dos conservatorios superiores de música de Vigo e A Coruña participarán os vindeiros 1, 2 e 4 de marzo nun concerto monográfico enmarcado no 250 aniversario do nacemento do compositor W.A. Mozart.

Con esta actividade, que leva por nome Encontros das orquestras dos conservatorios superiores de música de Galicia, a Consellería de Educación e Ordenación Universitaria pretende "mellorar e impulsar" a práctica orquestral do alumnado de especialidades sinfónicas da comunidade.

O concerto monográfico no que participarán alumnos dos conservatorios superiores de Vigo e A Coruña terá unha programación dedicada integramente ao compositor W. A. Mozart. Deste xeito, preténdese render tributo a un dos artistas dstacados para entender a historia da arte universal.

Así, o mestre Maximino Zumalave será o encargado de dirixir o concerto monográfico programado para os días 1, 2, e 4 de marzo, que terá na primeira parte o Concerto para clarinete e orquestra, e na segunda o Réquiem de Mozart. Os lugares nos que se desenvolverá o evento son as Igrexas de San Martín Pinario de Santiago (1 de marzo), María Auxiliadora de Vigo (2 de marzo), e Real Colexiata de Santa María do Campo de A Coruña (4 de marzo).

Para a preparación do concerto, o alumnado dos centros superiores de A Coruña e Vigo desprazouse ao Conservatorio de Santiago en xornadas intensivas de ensaios de mañá e tarde. Para os ensaios contaron coa colaboración de destacados solistas da Real Filharmonía de Galicia, así como de profesores dos conservatorios superiores.

O director compostelán Maximino Zumalave, formado musicalmente en Santiago, Madrid, Viena e Stuttgart, ten colleitado grandes éxitos e eloxios ao fronte de importantes orquestras de toda Europa nun amplo repertorio que se estende dese Monteverdi e Bach aos compositores contemporáneos.

O sistema educativo considera esta materia como un proceso de aprendizaxe "imprescindible para o futuro exercicio profesional", e, en consecuencia, outórgalle a máxima carga horaria no currículo tanto no grao medio como no grao superior. Por outra banda, as especialidades instrumentais que constitúen a base da orquestra sinfónica establécense como requisito para os centros superiores.