FERROL, 15 Oct. (EUROPA PRESS) -
A Raíña Dona Sofía presidiu no Arsenal Militar de Ferrol o acto de entrega das bandeiras militares doadas polo concello ás Escolas de Especialidades da Armada, nun acto no que enxalzou o "tradicional" e "moi estreito vínculo" que une á Armada española coa urbe na que se conmemora a concesión do título de "cidade" outorgado en 1858.
O acto castrense comezou ás 17.00 horas, coa presenza dunhas 150 autoridades militares e civís, presididas polo Almirante Xefe do Estado Maior da Armada, Manuel Rebollo; o conselleiro de Presidencia, José Luis Méndez Romeu; a presidenta do Parlamento, Dolores Villarino; e o alcalde de Ferrol, Vicente Irisarri, á fronte da comitiva municipal, na que non participaron os concelleiros do grupo de goberno IU, nin do BNG.
Na entrega de bandeiras, que congregou uns 300 militares das Escolas de Especialidades 'Antonio de Escaño' e a 'Graña' (Esengra) tamén estivo presente un grupo duns 20 escolares do Colexio Discípulas de Jesús, que ondearon bandeirolas de España e algunhas decenas de persoas como público.
A Raíña, vestida con traxe negro longo e mantilla española, recibiu de mans do alcalde as bandeiras militares, que foron doadas polo Concello de Ferrol e adquirida polo anterior goberno local presidido por PP e IF cun custo aproximado de 18.000 euros. Ata o momento, as Escolas utilizaban a bandeira do Terzo Norte para os seus actos institucionais.
No seu discurso, Dona Sofía destacou a vinculación de Ferrol coa Mariña e mostrou o seu "orgullo" por presidir un acto "simbólico e solemne" nunha cidade "tan estreitamente ligada dende o punto de vista histórico" coa Marina, e en "datas tan sinaladas" como é a conmemoración do 150 aniversario da concesión do título de cidade, que foi outorgado o 13 de outubro de 1858.
Tras manifestar que a súa Maxestade El Rei "envía tamén o seu saúdo máis cariñoso" aos compoñentes da Armada e das Escolas, agradeceu ao "pobo de Ferrol", "representado polo seu Alcalde e Corporación Municipal, pola xenerosa doazón destas bandeiras, que simbolizan e reforzan aínda máis o tradicional e moi estreito vínculo desta nobre cidade coa Armada española".
Dona Sofía dirixiuse aos membros das dotacións das Escolas de Especialidades, aos que recomendou "ser conscientes" da formación que reciben, e da necesidade de "estar á altura dos retos estratéxicos e tecnolóxicos que os tempos actuais esixen a unha Armada moderna, chamada a desempeñar un papel relevante no contexto internacional".
No acto de entrega de bandeiras, o alcalde de Ferrol, Vicente Irisarri, subliñou no seu discurso a vinculación da cidade coa Monarquía e a Marina, cunha Armada "determinante" no seu crecemento demográfico e no seu desenvolvemento, e cunha historia local escrita a través do "fío condutor" marcado polo Estado, a Coroa e a Armada.
Irisarri afirmou que, tras 150 anos de cidade, Ferrol ten "plena confianza no seu futuro, sabedora de que segue contando co apoio do Estado e o cariño da Armada,", polo que, pese "aos difíciles momentos de crise internacional", Ferrol "sairá adiante".
O alcalde de Ferrol deixou caer que, malia infraestruturas como o porto exterior ou o próximo polígono industrial de Leixa como "catalizadores do despegue definitivo" da economía, "quedan moitos retos" pendentes, entre os que citou o acceso ferroviario ao porto exterior, para o que reclamou "o apoio do Estado". O Goberno non incluíu nos seus Presupuestos Generales del Estado ningunha partida económica para a infraestrutura.
EXPOSICIÓN FOTOGRÁFICA
Posteriormente ao acto castrense, a Raíña Dona Sofía inaugurou no museo da Exposición Naval de Ferrol (Exponav), a mostra "A fotografía decimonónica en Ferrol", que recolle máis de 100 instantáneas tomadas entre 1858, días antes da visita oficial que realizou á cidade a Raíña Isabel II, e 1900, en coincidencia coa visita do Rei Alfonso XIII á fábrica de fiados que se situaba no municipio veciño de Neda.
Son fotografías que recollen a imaxe de Ferrol, dos seus veciños, os seus estaleiros e o Arsenal militar, nunha mostra que "pretende revelar o auténtico aspecto da cidade na segunda metade do século XIX", e coa que se conmemora o título concedido pola Raíña Isabel II o 13 de outubro de 1858.
