BRUXELES, 26 Ago. (EUROPA PRESS) -
Tres millones de persones de la Unión Europea atoparon un puestu de trabayu nel primer trimestre de 2016, lo que correspuende al 15,4% de tolos que s'atopaben paraos nel cuartu trimestre del pasáu añu, según los datos publicaos esti xueves pola oficina estadística comunitaria Eurostat.
Asina, trece millones de persones, el 65,7%, siguieron en situación de desempléu nos tres primeros meses de 2016 , mientres que 3,7 millones de persones (el 18,9%), entraron en situación d'inactividá económica.
Amás, el 96,2% de les persones que teníen un puestu de trabayu caltiénenlu, mientres que'l 1,7% (2,9 millones) perdiéronlu y el 2,2% (3,8 millones) pasaron a situación d'inactividá.
Los fluxos del mercáu llaboral amuesen los cambeos ente les situaciones d'empléu, desempléu y inactividá económica nel conxuntu de la UE. Eurostat esplicó nun comunicáu que pue haber diferencies ente estos datos y aquellos asoleyaos poles autoridaes nacionales de resultes de la metodoloxía harmonizada que s'usa pa poder comparar cifres.
Dinamarca foi'l país nel que más porcentaxe de paraos atoparon un puestu de trabayu nel primer trimestre d'esti añu, con un 30,3%, siguíu de Suecia (22,5%), Austria (22,3%), Portugal (20,2%) y Francia (19,9%). N'España, con un 16,1 %, asitióse tamién percima de la media.
