La 39ª edición de la Selmana de les Lletres Asturianes va dedicase a la lliteratura infantil y xuvenil

Np, Documento Y Foto Progrmación De La Selmana De Les Lletres Asturianes
GOBIERNO DE ASTURIAS
Publicado 23/04/2018 15:51:45CET

UVIÉU, 23 Abr. (EUROPA PRESS) -

La 39ª edición de la Selmana de les Lletres Asturianes va dar protagonismu a la lliteratura infantil y xuvenil p'afalar el vezu de la llectura n'asturianu y gallego-asturianu ente los más mozos. Dende'l vienres próximu, 27 d'abril, y hasta el 8 de mayu van desenvolvese en nueve conceyos más d'una ventena d'actividaes ente talleres, esposiciones, homenaxes, presentaciones de llibros, llectures públiques, certames lliterarios, alcuentros escolares, entregues de premios, visites guiaes, conciertos y representaciones teatrales, ente otres.

El programa de la Selmana empieza'l día 27, a les 07.00 hores, cola celebración del 'Alba de les lletres asturianes' na escuela de Llorgozana (Carreño), que va rematar con un taller sobre la obra d'Antón de Marirreguera, primer autor conocíu n'asturianu. Esa mesma mañana, en Santolaya (Cabranes) va celebrase un homenaxe a la escritora local María Josefa Canellada y va representase una adaptación teatral de la so obra 'Montesín', mentes que nel Centru de Cultura Antiguu Institutu de Xixón va inagurase la esposición Falar ensin parar, que va tar abierta hasta'l domingu 20 de mayu.

El llunes 30 empiecen les visites guiaes en llingua asturiana per delles localidaes: esi mesmu día n'Avilés; el martes 1 de mayu n'Uviéu; el 2 en Xixón, y la fin de selmana siguiente, en Ribeseya.

El miércoles 2 de mayu, la Xunta Xeneral del Principáu va acoyer la tradicional llectura pública institucional de testos n'asturianu y gallego-asturianu. Esa mesma tarde, a les 19.00 hores, va celebrase nel auditoriu de Siero l'espectáculu musical Xentiquina: una mirada a la lliteratura infantil.

Amás, a les 19.30, en collaboración cola Fundación Aula de les Metáfores de Grau, van entregase los diplomes del V Premiu de Poesía que se convoca pal alumnáu d'esi conceyu nun actu poéticu musical cola presencia de Pablo X. Suárez, ganador del Premiu Xuan María Acebal de Poesía 2017.

VI Feria del llibru y discu n'asturianu

La VI Feria del llibru y discu n'asturianu, entamada col Conceyu d'Avilés y l'Asociación de Llibreríes del Principáu, va inaugurase'l xueves 3 de mayu cola presentación de les ediciones conmemorativas 'Cúntame un cuentu' y 'Cúntame un conto', dos obres, n'asturianu y gallego-asturianu, respectivamente, qu'inclúin rellatos infantiles y xuveniles de 18 autores ilustraos por otros tantos dibuxantes.

Estos dos llibros van regalase'l vienres 4 de mayu, Día del Llibru Asturianu, en 53 puntos al mercar llibros y discos n'asturianu o en gallego-asturianu. La feria, instalada na plaza de Domingo Álvarez Acebal, va tar abierta hasta'l 6 de mayu.

Nel programa de la Selmana, Corvera va acoyer trés actos: el miércoles 2, Versovera, un alcuentru poéticu nel centru cultural de Les Vegues; el vienres 4, nel Teatru El Llar, la obra 'Crisis y otres histories', d'Adolfo Camilo Díaz; y el llunes 7, el recital poéticu 'Los testos de los músicos del país como piecines de teatru'.

El xueves 3 de mayu, a les 18 hores, el teatru de Llaboral Ciudá de la Cultura va acoyer la gala d'entrega de premios del V Certame de Teatru Escolar. Tamién pal públicu escolar tán pensaos los espectáculos 'El viaxe de Dorothy y Quixote', nel mesmu allugamientu, el llunes 7 y el martes 8, respectivamente, a les 11 hores.

El vienres 4, el IES Víctor García de la Concha de Villaviciosa va ser l'escenariu del actu institucional de celebración de la Selmana de les Lletres cola entrega de los premios de los certames artísticu y lliterariu.

El gallego-asturianu va tar presente nel Auditoriu d'As Quintas, d'A Caridá (El Franco), el sábadu 5 de mayu, a les 19.00 hores, col 'Homenaxe ás nosas lletras', una representación d'As miserias de Llázaro de Tormes, con Carlos Alba, Cellero. Trátase d'una versión en gallego-asturianu de la obra Llázaro de Tormes, ganadora del I Premiu Nel Amaro de teatru profesional n'asturianu, que va poder esfrutase tamién el Teatru Vital Aza de La Pola (L.lena) al otru día, a les 20.00 hores.

El programa cierra'l martes 8, en Salar Borrón d'Uviéu, cola tercer edición de 'Entaína a escribir', un concursu de microrrellatos improvisaos n'asturianu pa mozos que se convoca en collaboración col Institutu Asturianu de la Muyer y Polítiques de Mocedá.