LOS ÁNXELES, 18 d'Avientu (Reuters/EP)
Actores y directores d'Hollywood criticaron esti miércoles la decisión de la compañía Sony Pictures de cancelar l'estrenu de la película 'The Interview', una comedia sobre una intriga p'asesinar al líder de Corea'l Norte, Kim Jong Un, tres les amenaces y los ataques informáticos d'un grupu d'hackers.
Los actores Ben Stiller, Steve Carell, Rob Lowe, amigos de los protagonistes de la cinta, Seth Rogen y James Franco, criticaron la decisión de les sales de cine y de Sony. "Los hackers ganaron. Una victoria total y completa pa ellos", escribió Lowe --que realiza un 'caméu' na película-- al traviés de la so cuenta de Twitter.
La película ye una comedia sobre dos periodistes reclutaos pola CIA p'asesinar al líder norcoreanu, Kim Jong Un.
Investigadores determinaron que los hackers que tán detrás del ataque informáticu al estudiu Sony Pictures "trabayen pa Corea'l Norte", según fontes policiales estaounidenses consultaes pola cadena CNN. El Gobiernu estaounidense tovía nun confirmó estos fechos, anque asegura que'l FBI ta trabayando nello.
