MIERES, 24 Abr. (EUROPA PRESS) -
El secretariu xeneral del SOMA-Fitag-Ugt, José Luis Alperi, aseguró esti martes en Mieres que'l sindicatu al que representa nun va arrenunciar a la defensa del campus de Barreo, y mesmo plantea una movilización que podría celebrase'l mes de mayu próximu.
El responsable sindical, qu'apuesta pola implantación del Grau de Deportes nel campus de Barreo, apuntó "si pela parte de la negociación, de los contactos pertinentes, nun hai'l resultáu que toos esperamos, puede convocase perfectamente una manifestación qu'acabe con una concentración" nel complexu universitariu mierense.
Alperi, qu'esti martes caltuvo un alcuentru col alcalde, Aníbal Vázquez, señaló que pal SOMA'l campus de Barreo ye "un proyectu singular que creimos dende'l principiu que podría contribuyir de manera positiva al cambiu de la estructura socioeconómica de los valles mineros". Motivu pol que "nun vamos arrenunciar a que s'implemente y desenvuelva na so totalidá".
Tamién recordó la reclamación del sindicatu sobre la necesidá d'ellaborar un plan estratéxicu que permita "implementar y dar conteníu" a un campus que tien capacidá pa 6.000 estudiantes y que ta al 15 o al 20 por cientu.
Nel plan mentáu "nun podemos arrenunciar a falar de tolos elementos", como un plan de tresporte afayadizu que "permita los desplazamientos a Mieres de manera ordenada y normal", el desarrollu y usu de la residencia d'estudiante que "ye tamién un modelu n'Asturies y fuera", amás de la investigación y titulaciones "afeches y modernes qu'esixa'l mercáu llaboral".
