UVIÉU, 18 Jul. (EUROPA PRESS) -
El secretariu xeneral del SOMA-FITAG-UXT, Jose Luis Alperi, foi'l primera testigu en declarar nesta sesión nueva del xuiciu al ex líder del SOMA y ex senador socialista, José Ángel Fernández Villa. Alperi indicó que'l SOMA, cola auditoria esterna encargada, quería comprobar si'l dineru regularizáu por Villa al traviés de l'amnistía fiscal provenía de la organización.
Na so declaración aseguró que si la organización presentó una querella ye porque consideren que Villa s'apoderó de dineru y patrimoniu del sindicatu, tales como'l vehículu Mitsubishi que se-y reclama. "Villa llevó mochiles de congresos, bolígrafos, llibros, documentos y alcordances qu'entendemos que son del sindicatu", dixo.
Na so declaración esplicó que foi secretariu d'organización dende avientu de 2010 hasta mayu de 2013, siendo Villa secretariu xeneral y indicó que decidieron facer una auditoria de les cuentes que s'aceleró al conocer los datos derivaos de la amninistía fiscal. "Queríamos comprobar si'l dineru regularizáu saliera o non de la organización", manifestó, Alperi qu'esplicó que lo encargaron a un auditor con esperiencia.
Rellató qu'a día de güei el SOMA-UXT nun tien gastos de representación, abona'l deriváu de l'acción sindical y manifestó que los estatutos de la organización siguen siendo los mesmos. Añadió qu'en 2014, siendo presidente de la Xunta Alministradora, deciden exercese toles acciones xudiciales, incluyida la penal, pa recuperar tol patrimoniu de la organización.
"Xurídicamente lo que se ve na auditoría esterna ye qu'hai dos máximos responsables, que son Villa y Castillejo, por eso les querelles van dirixíes hacia ellos", esplicó Alperi, qu'aseguró que nel momentu que s'empecipia'l procesu xudicial "la idea ye que remate", d'ehí que nun aceptara la devolución del vehículu
Sobre'l paradoriu de les axendes del acusáu, Alperi indicó que "nun sabe onde tán" pero s'imaxina que van tar "empaquetaes na so casa de La Felguera". Eses declaraciones llevantaron la protesta del procesáu qu'indicó "eso ye mentira" y que llamó al orde la Maxistrada.
OTROS TESTIGOS
El que fora secretariu de Xunta d'Alministración del SOMA de 1994 a 2014, Amalio Fernández, esplicó que les cuentes yeren aprobaes nes xuntes celebraes "cada cuatro o seis años". "Nun se convocaba davezu. Yo nuna ocasión mandé una circular afirmando que considera que yera necesario axuntar pero José Ángel Fernández Villa nun la consideraba necesario", dixo.
Tamién declaró que nel so momentu él alvirtió que nun yera necesario mercar un vehículu nuevu pero que-y comunicaron que lo mercaría Villa personalmente. "En nenguna Xunta aprobóse la compra del coche nin que se-y pagara a Villa por él", dixo.
Afirmó que les dietes por asistir a la xuntes del Comité Intercentros d'Hunosa pagábales SOMA-UGT, pero nunca Hunosa. Aseguró que si tenía que pagar dalgo en mano yera Juan Cigales, el contable, que-y daba'l dineru y el firmaba'l recibí.
"NUNCA SE CUESTIONARON LOS GASTOS DE VILLA"
Na vista prestó declaración l'ex presidente del Montepio, José Antonio Postigo. Fíxolo por videoconferencia y declaró que siempre había que xustificar tolos gastos que se pasaben por desplazamientos, xintes y demás y manifestó qu'en "los sos 30 años na organización nunca enxamás se punxeron en cuestión los gastos nin de Villa nin de nengún otru compañeru".
Sobre la compra del vehículu qu'utilizaba l'ex líder sindical, el Mitsubishi Montero, indicó que decidieron mercar esi vehículu polos motivos de salú de Villa y mercóse al so nome por cuestión d'aforru, anque lo pagaba'l sindicatu. Aseguró que tanto él como otros compañeros conducieron esi coche en numberoses ocasiones.
Tamién indicó que Villa "perdió bien de veces les tarxetes y la cartera. Eso sábenlo na executiva y Juan Cigales que yera quien les diba a sacar", dixo Postigo, qu'indicó que viaxó "bien de veces" con Villa y yera el quien pagaba cola tarxeta.
Tamién por videoconferencia declaró'l que fora miembru de la Executiva del SOMA-UXT, Armando Fernández Natal.
TENSIÓN COLA LLETRADA DE LA DEFENSA
L'abogada de la defensa, Ana Boto, formuló numberoses protestes a lo llargo de la vista, al considerar la Maxistrada, María Luisa Barrio, que munches de les entrugues que formulaba yeren improcedentes. Barrio llegó a pidir a la lletrada que nun-y "retara".
El xuiciu a José Ángel Fernández Villa va volver a celebrase esti miércoles depués de ser suspendíu por cuenta de la hospitalización del acusáu. La sesión próxima ta señalada pal llunes día 23 a les 10.00 hores.
