UVIÉU, 19 Jun. (EUROPA PRESS) -
El Senáu refugó esti llunes una enmienda impulsada polos senadores de la coalición Compromís pa incluyir nel proyectu de los Presupuestos Xenerales del Estáu (PGE) una partida de 100.000 euros pa l'Academia de la Llingua.
Según informó Compromís al traviés d'una nota de prensa, tolos senadores asturianos, seis en total, votaron en contra de la iniciativa. Trátase de Fernando Goñi, Mario Arias y Ovidio Sánchez pol PP; María Luisa Carcedo y Vicente Álvarez Areces pol PSOE y Rosa María de Posada por Foru.
Votaron a favor Compromís, Unidos Podemos, ERC, Bildu y una senadora non adscrita, astuviéronse PDCAT, Coalición Canaria, PNV y Nueva Canaria, y votaron en contra PP, PSOE y Foru Asturies.
Foron los senadores de Compromís Carlos Mulet y Jordi Navarrete los que decidieron incluyir la enmienda cola xustificación de "equiparar la llingua asturiana a otres cooficiales del Estáu español". El dineru diba incluise na partida del Ministeriu d'Educación, Cultura y Deporte, restándolo de lo conseñao nel programa de Museos.
El Plenu del Senáu aprobó esti llunes el testu del proyectu de Presupuestos Xenerales del Estáu (PGE) pa 2018 cola incorporación de 44 enmiendes del PP y del Partíu Aragonés (PAR), colo que remata la so tramitación na Cámara Alta y el proyectu vuelve agora al Congresu p'aprobalos definitivamente colos cambios introducíos o na so versión orixinal.
