UVIÉU, 6 d'Ochobre (EUROPA PRESS)
El Plenu del Conceyu d'Uviéu aprobó esti martes por unanimidá'l cambiu de los Reglamentos Orgánicos de Gobiernu y Alministración y de Participación Ciudadana, no relativo a los Distritos, como frutu d'un ampliu consensu algamáu, lo mesmo ente tolos grupos municipales como colos colectivos asociativos de la ciudá.
Esti reglamentu pretende "abrir la puerta de la participación a les vecines y vecinos d'Uviéu", en palabres del alcalde Wenceslao López. "Puerta qu'a dalgunos quédamos pequeña y con retrasu de décades, pero que ye importante porque por fin ábrese en collaboración colos movimientos asociativos", añadió.
Na mesma llinia, la vicealcaldesa Ana Taboada remarcó l'interés del Equipu de Gobiernu llocal pa poner en marcha "cuanto antes" lo mesmo'l reglamentu como los Conseyos de Distritu, col compromisu de potenciar, dende'l diálogu, "la tresparencia y la democracia participativo".
Nesti puntu de la sesión plenaria tamién tomaron la palabra los representantes vecinales Emilio Peña, Juan García y Ramón del Fresno, qu'agradecieron poder intervenir "la primer vez" nun plenu y el compromisu igual de l'anterior como de l'actual corporación pa favorecer la collaboración vecinal nel procesu, al tiempu que valoraron que s'acabe cola figura de los alcaldes de barriu. "El testu nun ye'l meyor, pero sí'l menos malu", señalaron ante un salón llenu y nel que nun faltaron crítiques per parte de dellos asistentes.
