MADRID, 16 Ago. (EUROPA PRESS) -
El barcu de rescate 'Aquarius', xestionáu poles ONG SOS Mediterranée y Médicos Ensin Fronteres (MSF), abandonó esti xueves el puertu de la capital de Malta, La Valeta, un día depués de desembarcar a 141 migrantes y refuxaos que rescataron nel Mediterráneu'l 10 d'agostu pasáu.
"Aplaudimos el papel de les autoridaes malteses pa ufrir un puertu seguru onde desembarcar. Estos esfuercios tienen de caltenese pa poner en marcha un modelu de busca y salvamentu vidable énte la crisis humanitaria actual", publicó en Twitter SOS Mediterranée.
El barcu atracó en Malta gracies a un alcuerdu nel que tamién taben implicaos primeramente España, Francia, Luxemburgu, Portugal y Alemaña, que se comprometieron a repartise los migrantes. Fontes del Ministeriu del Interior italianu confirmaron al diariu 'La Repubblica' que tamién Italia va participar nesta iniciativa.
Polo menos 1.524 persones perdieron la vida anguaño nel Mediterráneu intentando llegar a les mariñes del sur d'Europa, según datos de la Organización Internacional pa les Migraciones. D'elles, polo menos 1.111 perecieron intentando algamar Italia, mentes que'l númberu de víctimes na ruta española yá supera les 300.
