UVIÉU, 30 de Xunu (EUROPA PRESS)
El Xulgáu d'Instrucción númberu 1 de Xixón decretó, a pidimientu de la Fiscalía del Principáu d'Asturies, el sobreseimientu provisional de la causa abierta pol vertíu na ría d'Aboño producíu'l 26 de xunu del 2012. El Xulgáu fai suyes les conclusiones del Ministeriu Fiscal, nel sen de nun considerar debidamente xustificada la perpetración de delitu dalgunu. L'autu del Xulgáu nun ye firme y contra él cabe recursu de reforma y subsidiariu d'apelación.
Según l'autu del Xulgáu, y tal como caltuviera nos sos socesivos informes la Fiscalía del Principáu d'Asturies de les dilixencies practicaes hasta la fecha, "nun se xustifica la imputación d'un delitu contra los recursos naturales y el mediu ambiente a la Central Térmica d'Aboño o persones responsables o trabayadores de la mesma pol vertíu que se produxo na ría en xunu del 2012".
Y esto sorraya l'autu y caltuvo el Ministeriu Fiscal, "al nun acreditase, nin siquier en calidá de nicios, una conducta que pudiera calificase de neglixencia o imprudencia grave y, menos tovía intencional, nel frayatu por fatiga d'una válvula". L'autu añade que tampoco existía nos informes "dato algún que lleve a pensar que'l frayatu yera previsible o s'incumpliera dalgún deber nel control del estáu de la mesma per parte de la empresa". Tampoco resultó acreditada la previsibilidá de la fisura que se produxo na arqueta y que determinó que'l fuel vertíu tres el frayatu de la válvula, en cuenta de quedar confináu nel sistema de recoyida d'agües pluviales, pasara a la canal d'agües de refrixeración y, d'ehí, a la ría".
Coles mesmes, l'autu caltién que tampoco resultó probao que la empresa fuera consciente de qu'existía una conexón ente los sistemes 11 y 8, o que tuviera de selo, y que, tres los fechos, "nun se detectó incidencia grave, nin daños nel equilibriu del ecosistema a por mor del vertíu".
El Xulgáu considera que les dilixencies practicaes son "abondo" y que nun se precisen nueves actuaciones y asume como suyes les conclusiones de los diversos informes ellaboraos pol Ministeriu Fiscal, l'últimu d'ellos fecháu'l 15 de mayu pasáu.
