UVIÉU, 23 May. (EUROPA PRESS) -
Militantes asturianistes de Foru, como l'empresariu Inaciu Iglesias, l'exconceyal de Cultura d'Uviéu José Luis Arias-Cachero o'l militante xixonés Xuan Pandiella, destacaron la ilusión que ta xenerando la posible candidatura de Carmen Moriyón. Sobre'l tema del asturianu señalen la so "coherencia" col programa del partíu, onde se fala de la oficialidá del asturianu.
En declaraciones a Europa Press, estos militantes mostraron el so apoyu a la posible candidatura de l'alcaldesa de Xixón a les autonómiques del 2019 depués de que les agrupaciones de Siero, Noreña y Somiedu propunxéranla como presidenta del partíu y, polo tanto, candidata nes elecciones.
L'empresariu y ex conceyal de Cultura d'Uviéu José Luis Arias-Cachero faló de la "ilusión" que xeneró la so posible candidatura y del "nerviosismu" d'otres fuercies polítiques pola mesma. Asina, indicó que se recupera "l'espíritu del 2011" y destacó la "imaxe tresversal" y la so xestión en Xixón como "un cambiu sustancial pa meter a Foru nel partíu pa les elecciones del 2019".
Per otru llau, el xixonés Xuan Pandiella esplicó que la posible candidatura podría "facer medrar la ilusión nesti proyectu", amás de qu'ayudaría a "defender los intereses d'esti país". Otra manera, l'empresariu y líder de Foru en Noreña hasta 2017 --momentu nel qu'entregó l'acta por motivos llaborales--, Inaciu Iglesias, indicó que-y prestaría que Carmen Moriyón se presentara.
MORIYÓN Y L'ASTURIANU
L'alcaldesa de Xixón participó en setiembre del añu pasáu na presentación na so ciudá del 'Proyectu 2018', una iniciativa de la Xunta pola Defensa de la Llingua Asturiana que busca l'aprobación de la oficialidá nesta llexislatura. Nesi momentu, el diputáu 'popular' David González Medina acusóla de tar "presa de la axenda política de Podemos".
Selmanes depués, Moriyón y el so equipu de gobiernu votaron a favor d'una moción qu'encamentaba a la Xunta Xeneral a iniciar la reforma del Estatutu pa incluyir la oficialidá. Una situación que foi criticada pola líder del PP asturianu, Mercedes Fernández, que l'acusó de "abrazar la radicalidá".
La presidenta de Foru actual, Cristina Coto, vien defendiendo que col desarrolló del marcu llexislativu actual --la Llei d'Usu y Promoción del Asturianu de 1998-- ye abondo. Nesi sentíu, acusó a la FSA y al so secretariu xeneral, Adrián Barbón, de xenerar un "conflictu" na sociedá asturiana al abrir el debate de la oficialidá.
Too eso a pesar de que'l programa electoral col que Foru se presentó a les elecciones del 2015 fala d'apoyar la oficialidá "cuando se den les circunstancies políticas y el consensu social afayadizu que permitan la reforma del Estatutu".
Sobre esti tema, Iglesias afirmó que Carmen Moriyón "polo menos enseñó coherencia pa col nuestru programa". Nel mesmu sentíu espresóse Arias-Cachero, que se remite tamién a lo que diz el programa, "que ye abondo claro". "Dada la esperiencia y la práctica de Carmen en Xixón pienso que vamos poder tener una posición más tresversal y trabayar polos consensos, como diz el programa", afirmó.
Per otru llau, Pandiella destacó que col tema del asturianu, l'alcaldesa de Xixón foi "tranquila ensin discusiones grandes y con consensos". "Poco a poco foi trabayando na llinia de tener l'asturianu presente nel Conceyu y nes empreses municipales", esplicó. Con too, afirmó que ye "mui ceo tovía" pa falar sobre'l votu posible de Moriyón a una reforma del Estatutu con oficialidá.
"Tamos falando d'una posible candidatura a unes primaries, nun podemos poner el carru delantre los gües, primero vamos intentar que sía presidenta de Foru y depués vamos dir viendo", indicó, pa sentenciar que'l "trabayu ta fecho y hai que siguir nesa llinia".
