UVIÉU, 31 d'Ochobre (EUROPA PRESS)
El presidente del Gobiernu d'Asturies, Javier Fernández, resaltó esti vienres la importancia del periodu de dos meses que s'abrió pa presentar alegaciones a la decisión de la Comisión Europea de pidir la devolución d'ayudes por valor de casi 250 millones pa les obres d'ampliación del Puertu d'El Musel (Xixón), yá realizaes. Lo importante agora, dixo, ye que se formulen alegaciones "contundentes" pa tornar esa posición de la Unión Europea.
Nunes declaraciones nos pasiellos de la Xunta Xeneral del Principáu d'Asturies (XXPA), Fernández consideró que neses alegaciones tien tamién que participar de forma activa'l Gobiernu central. "L'Estáu tamién tien que defender los sos propios actos", señaló, nel sen de que l'Executivu central avaló nel so día tol procesu de contratación.
Fernández reprochó a la UTE encargada de l'ampliación que nun abriera la so contabilidá a la Oficina Europea de Llucha Contra'l Fraude (OLAF). Tol procesu d'alegaciones, añadió, ye independiente de cualquier procesu de tresparencia.
"A mi lo que más me preocupa ye que los 249 millones retiráronse de manera definitiva y espero que nesti tiempu d'alegaciones, los que tienen que faceles seyan contundentes bastante pa qu'esos recursos aplíquense a la obra", indicó.
Fernández evitó la palabra 'espilfarru' pa falar de l'actuación n'El Musel y centróse en falar de la perda de competitividá que supondría p'Asturies la perda de les ayudes europees. "Vamos procurar de toles formes posibles que'l puertu respuenda a les espectatives", comentó'l presidente asturianu.
