UVIÉU, 24 d'Abril (EUROPA PRESS)
Los conseyeros d'Educación, Genaro Alonso, y de Sanidá, Francisco del Busto, presentaron esti llunes l'ampliación de la ufierta educativa del Principáu d'Asturies que'l próximu cursu va contar con dos asignatures de llibre configuración autonómica sobre educación pa la salú en 1º y 2º de la ESO.
Estes nueves materies busquen fomentar vezos de vida saludables ente los adolescentes asturianos de forma estable y reglada, lo que supón un pasu más nesti tipu de formación dende los programes puntuales que mientres años vinieron realizándose. Los centros van poder presentar solicitúes pa impartir estes materies hasta'l 15 de mayu.
En 1º de la ESO la materia denominaráse 'Estilu de vida saludable' y va tratar aspectos como'l bienestar físico, psíquico y social del alumnáu con conteníos sobre nutrición, actividá físico, autoestima ya imaxe corporal, estereotipos sexistes ya discriminación, hixene personal y postural, prevención de consumu de sustancies nocives, habilidaes afectives y sociales o prevención del acosu.
L'asignatura de 2º de la ESO plantégase como 'Proyectu de vida saludable' na que los estudiantes van alquirir mañes p'aprovechar l'entornu natural, social y cultural que favoreza'l so desarrollu afectivo y cognitivo.
La Conseyería d'Educación y Cultura ellaboró guíes pa facilitar la planificación y el desarrollu de les asignatures. El manual inclúi'l currículu, les unidaes didáctiques ya instrumentos d'evaluación. Amás, Educación prevé'l cambiu del decretu 43/2015, de 10 de xunu, pol que se regula la ordenación y establezse el currículu de la ESO pa incluyir estes asignatures como específiques.
Mientres la rueda de prensa, Francisco del Busto calificó de "fundamental" esti tipu de formación pa desarrollar "un estáu óptimu de salú", de la que defendió que la educación pa la salú torne en "exe trasversal" nel procesu educativu.
Pela so parte, Genaro Alonso resaltó la importancia de la collaboración ente Educación y Sanidá pa ofrecer "una formación integral" qu'atienda "les necesidaes educatives de los adolescentes qu'inflúin nel so aprendizaxe y desarrollu".
