UVIÉU/MADRID, 2 de Marzu (EUROPA PRESS)
El conseyeru de Sanidá del Principáu d'Asturies, Faustino Blanco, alvirtió esti llunes del riesgu de que'l Plan Estratéxicu pal Abordaxe de la Hepatitis C fracase si'l mensaxe que'l Gobiernu quier treslladar a les comunidaes autónomes al respective de la financiación ye "yo convido, tu pagues".
"Venimos con preocupación porque tenemos la sensación de qu'esto ye 'yo convido, tu pagues'", y nesi casu hai "munchu riesgu de qu'un plan estratéxicu como ésti seya un plan fallíu y, poro, papel moyao", declaró a los periodistes antes de participaren una xunta informal nel Ministeriu de Sanidá, Servicios Sociales ya Igualdá xunto con otros conseyeros.
Blanco acusó al Executivu de Mariano Rajoy d'intentar "sacar ventaya política" col plan y criticó que, antes d'esplica-ylo a les comunidaes autónomes nun Conseyu Interterritorial, ficiera un periplu de presentaciones públiques" ante distintes organizaciones y nel Alderique sobre l'estáu de la Nación. "Los pacientes esperen de nós compromisu, responsabilidá y autoridá sanitaria", sorrayó.
