UVIÉU, 27 de Febreru (EUROPA PRESS)
Asturies tará presente na edición 2009 de la feria 'Expolingua Lisboa' (del 4 al 6 de marzu), una feria que, dende 1989, se celebra na capital portuguesa, y que ta dedicada al estudiu de les llingües. La comunidá tendrá ellí'l so 'stand', de 18 metros cuadraos y nel que tarán representaos, nos diferentes llibros espuestos, más de 40 autores.
La presencia d'Asturies na 'Expolingua Lisboa' anuncióse güei en rueda prensa presentada por la directora xeneral de Política Llingüística, Consuelo Vega, acompañada del poeta y coordinador lliterariu Xuan Bello, el secretariu de l'Academia de la Llingua, Francisco González Quevedo, y la presidenta del Gremiu d'Editores Asturianos, Marta Magadán.
El 'stand' d'Asturies inauguraráse'l día 4, y al actu tán convidaes más de 1.500 persones que componen la comunidá española en Lisboa, al frente de les cuales ta previsto que te dalgún representante de la Embaxada Español en Portugal, Alberto Navarro.
El 'stand' presentará volumes de tou tipu, non sólo específicamente lliterarios, puesto que tamién habrá presencia de la ufierta turística, etnográfica o cultural, según esplicó Magadán. En total serán diez les editoriales asturianes con presencia na sede asturiana de la feria.
Según Consuelo Vega, preténdese dar una imaxe d'Asturies como comunidá atractiva, moderna, con una importante riqueza cultural, paisaxística o cultural, y con una llarga historia de rellaciones con Portugal.
Tanto la presidenta de los editores como'l representante de l'Academia de la Llingua espresaron la so satisfaición por collaborar con esta iniciativa y la importancia de tar presentes na feria. Según Magadán, "ye importante establecer llazos de carácter comercial pa caltener la tendencia d'abertura y de salida al esterior del sector asturianu".
Quevedo afirmó que ye "mui interesante dir a Lisboa pa l'Academia y pa la llingua asturiana en xeneral". Recordó que yá tuvieren na feria n'otres ocasiones, y que percibió "cierta conciencia de identificación cola colonia mirandesa de la zona", en rellación a los habitantes de Miranda do Douro, una zona onde tienen una llingua propia oficial d'orixes asemeyaos al asturianu.
ANTOLOXÍA PORTUGUESA N'ASTURIANU
Paralelamente a los actos del Expolingua, va tener llugar, nel Institutu Cervantes de Lisboa, la presentación oficial de 'Una mirada diversa-Una olhada diversa', una antoloxía de poemes d'autores portugueses tornaos al asturianu, baxo la coordinación del escritor Xuan Bello.
Na presentación d'esti llibru, que va tener llugar el día 5 de tarde, van tar presentes dos de los autores tornaos, Valter Hugo Mae y Nuno Judice, que tamién van participar nuna mesa redonda sobre les rellaciones ente les lliteratures portuguesa y asturiana, na que tamién participarán Bello, Quevedo y dalgún editor portugués, toos coordinaos por Marta Magadán.
El volume recueye poemes n'asturianu y portugués de 16 destacaos autores lusos, toos ellos daos a conocer de magar los años 40. Ente ellos tán, Jorge Barbosa, Jorge de Sena, Eugénio de Andrade, Joao Camilo, Sophia de Mello Breyner, amás de los yá mencionaos Valter Hugo Mae y Nuno Judice.
Xuan Bello esplicó que ye una "antoloxía parcial", porque nun tán tolos autores importantes portugueses, sinón dalgunos de los que se destacaron de magar los años 40 o 50, con una poesía "más marcada por cierta narratividá, propensión hacia la canción pero dende presupuestos de prosa".
Según esplicó Bello, la publicación d'esta antoloxía ye "devolver una deuda", porque la poesía portuguesa foi "un modelu de referencia" pa munchos escritores de la so xeneración, como Pablo Antón Marín Estrada o Berta Piñán, amás d'él mesmu. Destacó que, en cuestión lliteraria, Portugal ye un prodixu, por tener namás que nueve millones d'habitantes y contar con una de les mayores riqueces poétiques d'Europa.
Nesti puntu, Consuelo Vega, recordó qu'en 1988, en Lisboa desarrolláronse una serie d'actos con presencia del Gobiernu asturianu, pa conmemorar la primer torna al portugués de 'La Regenta', de Leopoldo Alas Clarín, qu'ellí llamóse 'La Corregidora'.
