KABUL, 26 de Febreru (Reuters/EP)
Un total de 186 persones morrieron de resultes de los peores argayos de nieve rexistraos nos últimos 30 años n'Afganistán, onde ta previsto que les nevaes sigan mientres dos díes más, según informaron les autoridaes del país centroasiáticu.
Les autoridaes afganes alvirtieron de la inminente emerxencia humanitario que sufren les rexones más afectaes pola mala meteoroloxía, coles nevaes dexando dellos pueblos aisllaos y les carreteres bloquiaes.
"Nun viéramos tanta nieve y tantos argayos nos últimos 30 años", afirmó Abdul Rahman Kabiri, el gobernador en funciones de la provincia de Panjshir, al norte de Kabul, onde morrieron 186 persones y más de 100 resultaron firíes de resultes de los argayos.
A pesar de los problemes que xeneren, les nevaes son importantes p'Afganistán, un país nel que gran parte de la población depende de l'agua que llega de los montes en primavera y branu.
L'agricultura sigue siendo ún de los principales motores de la economía d'Afganistán, un país nel que trés cuartes partes de la población vive en zones rurales, según les estimaciones del 2004 de l'axencia de Naciones Uníes pa l'Agricultura y l'Alimentación.
Los sistemes de riegu nun tán bien estendíos n'Afganistán, un país en gran parte grebu, y los esfuerzos por ampliar el sistema nos últimos años nun llograron los oxetivos marcaos.
