MADRID, 1 d'Agostu (EUROPA PRESS)
El balance de víctimes de les esplosiones de gas rexistraes a última hora del xueves na ciudá taiwanesa de Kaohsiung, nel sur de la isla, subió a 22 muertos y 270 mancaos, según informó la cadena de televisión británica BBC.
De momentu desconozse la causa del socesu, magar delles informaciones apunten a que les esplosiones rexistráronse tres la rotura de delles tuberíes de gas.
"El Departamentu de Bomberos recibió llamaes alertando de fugues de gas y darréu produxéronse delles esplosiones qu'afectaron a una zona d'ente dos y trés kilómetros cuadraos", dixo'l Departamentu Nacional de Bomberos. Ente los muertos hai cuatro bomberos.
El primer ministru taiwanés, Jiang Yi Huah, creó un gabinete de crisis tres el socesu, atribuyíu poles autoridaes a una fuga de gas al traviés del sistema d'alcantarelláu, según l'axencia oficial de noticies CNA.
Pela so parte, l'alcaldesa de Kaohsiung, Chen Chu, solicitó a la población "que siga les instrucciones de los equipos de rescate presentes na zona y que nun queden nel llugar mirando". Equipos de bomberos y cientos de soldaos desplazáronse a les zones afectaes pa collaborar nos llabores de rescate.
"El Gobiernu llocal yá pidió a (les empreses de gas) CPC y Hsin Kao Gas que corten el suministru", añadió, encamentando a los residentes a caltener la tranquilidá.
