Resta importancia a la opinión de Javier Fernández sobre la llingua como xerme de nacionalismu y recuerda el casu gallegu
UVIÉU, 23 Ene. (EUROPA PRESS) -
El secretariu xeneral de la FSA-PSOE, Adrián Barbón, afirmó qu'estos últimos díes les "polémiques" nos medios "redúcense a la oficialidá y la candidatura del PSOE". Sicasí, señaló que "nin una persona" mostró-y la so preocupación sobre estos temes.
Al traviés d'unes declaraciones distribuíes pol so partíu, el líder socialista afirmó que "dacuando" los políticos manifiesten preocupaciones "que nun se correspuenden coles reales" de la ciudadanía. Asina, indicó qu'estos díes los "debates" nos medios redúcense a la oficialidá y la candidatura del PSOE.
"Nin una sola de les persones coles que falé mostráronme la so preocupación pola oficialidá o la candidatura del PSOE", afirmó Barbón, pa esplicar que los ciudadanos mostráron-y preocupación por problemes ganaderos o pesqueros. "Mesmamente, cayóme dalgún reproche, como que dexáramos gobernar a Rajoy, pero d'esos dos temes naide me dixo nada", afirmó.
Asina, Barbón indicó que-y llama l'atención el debate político y mediático, al traviés de les redes y los medios. "Ún plantéase que tien qu'haber un debate na cai de la hostia, pues güei naide me preguntó por eso", sentenció.
IDENTIDÁ Y LLINGUA
Per otru llau, Barbón restó importancia a les declaraciones del presidente asturianu, Javier Fernández, qu'afirmó esti martes en Madrid que nun se podía dexar de llau la existencia de grupos que van pensar na llingua asturiana como factor d'identidá.
"¿Cuadonga ye identitario? ¿El horru ye identitario? ¿Toes estes cuestiones identifíquennos? ¿Una tradición asturiana ye identitaria? Yo creo que too ye identitario, otra cosa ye qu'eso acabe en nacionalismu, pero nun tamos neso", dixo Barbón, que señaló qu'hai munchos símbolos d'Asturies, polo que la llingua sería ún d'ellos.
Amás, recordó que la única comunidá onde'l PP tien mayoría absoluta ye en Galicia, "onde la política llingüística ye perclara y nun almite nenguna dulda", destacó Barbón, nuna clara referencia a la posición del PP asturianu contraria dafechu a la oficialidá. "Son preocupaciones del debate políticu, pero non de la cai", incidió.
Nesi sentíu, quixo recordar que la posición del so partíu sobre la oficialidá del asturianu nun foi definida por él, "sinón pol 32u Congresu", pero sentenció que nesta llexislatura'l PSOE nun va apoyar una reforma del Estatutu. "Opondríamonos a una reforma, porque yá nun procede", anque abogó porque cuando esta se produza exista un diálogu ampliu, "nun namás de la esquierda".
