MADRID, 26 de Xunetu (EUROPA PRESS)
La diputada socialista Meritxell Batet declaró esti martes que'l PSOE "nun siente presión" del mundu empresarial pa qu'acabe permitiendo la investidura de Mariano Rajoy y avisó que, anque se produxeren, el PSOE nun diba dase por aludíu.
Al respective de la posible astención del PSOE na investidura de Mariano Rajoy que defendieron dellos antiguos socialistes, Batet respondió que namás espresen una opinión y que "a lo último" el partíu "tien un secretariu xeneral, unos órganos de dirección y un comité federal que ye "quien marca la posición del partíu".
Tamién, en relación coles voces de dientro del partíu que llamen a intentar una mayoría d'izquierdes afirmó que "eses voces son bien interesantes" pero que "esi escenariu ye bien difícil que se produza" porque "esa vía yá la intentó'l PSOE".
Preguntada pol baturiciu que xeneró l'estáu de WhatsApp del secretariu xeneral del PSOE, Pedro Sánchez, nel que podía lleese: "¿Y por qué non?", Batet cuntó que ye una pregunta "reflexiva" y que nun cree que "tenga más importancia".
Nuna entrevista en 'Los Almuerzos de TVE', recoyida por Europa Press, Batet dixo que lo qu'espera una sociedá "mayoritariamente d'izquierdes" ye que'l PSOE seya "l'alternativa al PP" y que nun s'entendería que pudieren dar apoyu a un gobiernu del PP que "dexeneró la democracia" o que "xeneró y afondó un conflictu territorial".
"Y si la tercer vez el señor Rajoy volviera dir a una investidura, paezme que sería una gran irresponsabilidá política", avisó. Amás afirmó qu'esto asitiaría a España otr avuelta en "un tiempu desconocíu, nun tiempu de 'impasse'".
