UVIÉU, 28 d'Abril (EUROPOA PRESS)
La conseyera d'Infraestructures, Ordenación del Territoriu y Mediu Ambiente, Belén Fernández, afirmó esti sábadu que'l "nuevu bandazu" del Gobiernu d'España al respective de la variante de Payares supón "un despropósitu dende'l puntu de vista técnicu y económicu, un despreciu a los asturianos y, amás, incumple'l pactu electoral de les dereches soscritu ente'l Partíu Popular y Foru n'avientu del 2015.
Nuna nota de prensa, Fernández refirióse al fechu de que Fomentu plantege agora "abrir los dos túneles de la variante al empar y n'anchu internacional. Aparte, el tramu León-La Robla "va acondicionase con triple filu".
Esti planteamientu, según la conseyera, "desdiz a la ex ministra Ana Pastor, tamién del Partíu Popular. Ella comprometiérase a abrir primero namás un túnel con una vía n'anchu ibéricu sobre traviesa polivalente. Ésa foi tamién la opción que defendió de primeres De la Serna, hasta'l so últimu cambéu de criteriu".
Nesti sen, la conseyera criticó "la memoria selectiva del únicu diputáu nacional de Foru Asturies, Isidro Martínez Oblanca. El xueves, esti parlamentariu sorrayó que l'acuerdu ente Foru y el PP esplicita la instalación d'anchu internacional en dambos túneles". Escaecióse, denunció Belén Fernández, de que'l mesmu pactu falara d'abrir "unu darréu y lo antes posible el segundu".
"MALPENES S'AFORRA TIEMPU
Fernández esplicó que "el cambiu anunciáu (anchu estándar frente a ibéricu) malpenes va suponer 6 minutos d'aforru ente Madrid y Uviéu". "N'anchu ibéricu, el trayectu ente dambes capitales duraría 2 hores y 49 minutos. Col internacional, 2 hores y 43. Un amenorgamientu insignificante que se repite nel casu de Xixón: de 3 hores y 18 minutos a 3 hores y 12 minutos", señaló la conseyera.
Pa la responsable d'Infraestructures, "a cuenta d'un mínimu aforru de tiempu, les dereches condenen a más de 3 millones de tonelaes de mercancíes al añu a siguir pasando pela prácticamente caduca rampla de Payares, en claru perxuiciu de l'actividá industrial y portuariu rexonal".
Fernández recordó qu'esti "nuevu bandazu" demuestra que trés ministros del PP intentaron engañar a los asturianos y al Gobiernu del Principáu.
