UVIÉU, 20 Nov. (EUROPA PRESS) -
La escritora Berta Piñán resultó ganadora de la décima edición del Premiu María Josefa Canellada de Lliteratura Infantil y Xuvenil en llingua asturiana, que concede la Conseyería d'Educación y Cultura. El xuráu decidió por unanimidá conceder el premiu a la obra titulada 'Vida nel campu', de la escritora de Cangues d'Onís.
El xuráu encargáu axuntóse esti llunes na Casa Conceyu de Cabranes, baxo la presidencia del director xeneral de Planificación Llingüística y Normalización, Fernando Padilla Palicio, y tuvo formáu pol escritor Adolfo Camilo Díaz, ganador de la edición pasada; la escritora Maite González Iglesias; l'asesora técnica del Serviciu de Planificación Llingüística y Normalización, Juncal García Velasco; l'alcalde de Cabranes, Gerardo Fabián, y el fíu de la escritora María Josefa Canellada, Alonso Zamora.
Ente les obres presentaes, el xuráu decidió por unanimidá conceder el premiu a la titulada 'Vida nel campu', que se presentó col seudónimu Teyín, al reconocer nella "una obra noble qu'escuende denuncia, pero que nun s'enllena con proclames innecesaries" y onde "el llector participa de los mesmos descubrimientos que los personaxes y dexa la valoración ética pal remate de la llectura", según destaca l'acta.
A esti gallardón, dotáu con 3.000 euros, podíen presentase obres de lliteratura infantil o xuvenil (noveles, compilaciones de cuentos, obres de teatru o poemarios) siempre que foren inédites y tuvieren una estensión mínima de 250 versos, nel casu de la poesía, y de 30 páxines a doble espaciu nos demás xéneros.
Berta Piñán (Cañu, 1963) destaca como una de les voces más sólides del Surdimientu lliterariu asturianu. Profesora de Llingua y Lliteratura y académica de la llingua asturiana, empezó cultivando la poesía nesti idioma nuna carrera poética con títulos como 'Al abellu les besties' (1986), 'Vida privada' (1991), 'Temporada de pesca' (1998), 'Un mes' (2002) y 'La mancadura' (2010), publicada n'edición billingüe asturianu-castellanu. Muestra de la so narrativa curtia son obres como 'La tierra entero' (1995) y 'La maleta al agua' (2005).
Ganadora de la primer edición del Premiu María Josefa Canellada cola obra 'Arroz, agua y maíz' (2009), el públicu infantil y xuvenil foi'l destinatariu de títulos d'ella como 'Lula, Lulina' (1996), 'El branu de Mirtya' (2005), 'Tres sieglos construyendo la igualdá' (2005), 'Les coses que-y presten a Fran' (2008), 'L'estranxeru' (2009) y 'La mio hermana ye una mofeta' (2011).
