UVIÉU, 6 d'Ochobre (EUROPA PRESS)
El conseyeru d'Empléu, Industria y Turismu, Francisco Blanco, esplicó esti martes los planes de la so conseyería pa la Sociedá Rexonal de Promoción, SRP, y destacó que'l conxuntu de la recuperación de cantidaes invertíes n'empreses "nos últimos años ye positivu". "Nunes gánase y n'otres piérdese, pero'l resultáu de la cartera ye positivu magar dellos proyectos fallíos", dixo Blanco qu'indicó qu'hai vixentes unes 200 operaciones.
Asina, el conseyeru insistió en que la SRP tien un activu d'unos 90 millones, cuando les aportaciones a empreses nun fueron de más de 60 millones. "Coles participaciones amás de financiar proyectos y crear 2.000 puestos de trabayu la SRP tien beneficios", esplicó'l conseyeru ante les acusaciones del PP, qu'insistió en preguntar polos proyectu fallíos, como Venturo XXI.
Blanco consideró "hipócrites" les crítiques del 'popular' Agustín Cuervas Mons, dao qu'insistió en que nun se pue falar namás de proyectos fallíos anque se contabilizaren unos 10 millones d'euros de capital fallíu y unos 2,7 millones de préstamos participativos de los 24 millones esistentes. "Les perdes en diez años de 500.000 euros nos préstamos", dixo.
El titular d'Empléu manifestó, de cara al futuru, que la SRP va siguir presente en determinaes actividaes con interés pa la rexón, con proyectos empresariales viables. "Ehí ye onde tendrá que tar presente la SRP pa ufiertar financiación", añadió. Asina, anunció que ta previsto publicar na páxina web les cuentes del 2015.
