MADRID, 28 de Mayu (EUROPA PRESS)
L'actual presidente de la FIFA, Joseph Blatter, ye'l candidatu que parte con más opciones d'imponese nes elecciones a la presidencia de la FIFA, nes que se mide al Príncipe Alí Bin Al-Hussein, magar vivir 48 hores convulses poles investigaciones y detenciones de siete miembros del organismu, dos d'ellos vicepresidentes (Eduardo Figueredo y Jeffrey Webb), que nun torgaron que los comicios sigan alantre.
Dempués de que la xusticia suiza, en coordinación col Departamentu de Xusticia d'Estaos Uníos, detuviera'l miércoles en Zúrich a dellos directivos acusaos de corrupción, el mandatariu suizu, de 79 años, sigue como favoritu a repitir nel cargu qu'ostenta dende 1998, cuando asocedió al brasileñu João Havelange, magar que paecía qu'acabaría la so carrera a lo más como mandatariu de la FIFA al cabu del cuartu mandatu.
En casu de salir reelixíu, sería'l quintu periodu de Blatter al mandu de la FIFA, cargu qu'ocupó mientres los últimos 17 años, y que nos últimos yá tuvo chiscáu siempre pola solombra de les males acciones, sobremanera nes axudicaciones a Rusia y Qatar de los Mundiales del 2018 y del 2022, principalmente sobre'l segundu, qu'a lo último disputaráse magar la oposición de les lligues europees en feches ivernales. Pel momentu, la Comisión Ética del so organismu desabriólu nel so momentu y agora los investigadores indicaron que nun ta acusáu de nada.
En tou casu, la UEFA solicitó l'aplazamientu de les elecciones al entender que nun ye'l meyor momentu pa que se celebren ya hasta'l l so presidente, el francés Michel Platini, pidió la viéspora la dimisión d'un Blatter, al qu'apoyó nes anteriores elecciones, pero col qu'anda engarráu yá dende va tiempu. Por ello, l'organismu continental apoya al otru candidatu, el Príncipe Alí Bin Al Hussein, anque non na so totalidá, con federaciones representatives como la de Rusia, onde hasta'l presidente del país, Vladimir Putin mostró la so confianza en Blatter, o la d'España, onde Ángel María Villar ye un home averáu al suizu.
El príncipe xordanu quedó como la única torga del actual presidente dempués de que los otros dos aspirantes, l'holandés Michael van Praag y el que fuera futbolista portugués del FC Barcelona y Real Madrid Luis Figo retirárense la selmana pasada. Tercer fíu del rei Hussein de Xordania y actual vicepresidente de la FIFA, ye amás de presidente de les federaciones de Xordania y de la WAFF (Federación de Fútbol d'Asia Occidental).
La candidatura d'Alí Bin Al Hussein pretende que les federaciones, xugadores, entrenadores, árbitros, aficionaos y patrocinadores tengan más poder nel organigrama, de la mesma que pretende restaurar la credibilidá de la FIFA. Amás, denunciaron esti martes la ufierta de 47 votos llograos de manera illegal como prueba de tresparencia.
Tou fai indicar que Joseph Blatter volverá ocupar el sillón presidencial, nun siendo sorpresa. Magar tolo asocedío'l miércoles, les Confederaciones d'África y d'Asia yá dexaron claro públicamente que lu van votar, y paez lo mesmo col votu americanu y d'Oceanía, lo que torna en casi milagroso que'l so rival puea evitar que llogre los dos terceres partes de les papeletes de les 209 asociaciones miembres que van encargase de decidir si'l fútbol mundial sigue'l so camín o decide cambiar.
